رأي. كان على المغرب يبتكر ردة فعل استعراضية ديبلوماسية قوية واخا غير ديال بالعاني باش يرد لينا الاعتبار حنا كشعب وصفنا سفيرهم باولاد الحرام

مدير جهاز مكافحة التجسس المغربي عبد اللطيف الحموشي مشا لفرنسا وهما ينزلو ليه ثلاث شكاوى قضائية وصيفطو استدعاء مع سبعة البوليس لدار السفير ففرنسا٬ والتهمة التواطؤ في أعمال تعذيب . طبعا المغرب رفض بشكل قاطع الاتهامات وناض دار الصواب و قالليهم أنا غضبان وما عاجبنيش الحال و تانشدد اللهجة و داكشي , ثم و كأن وزارة الخارجية الفرنسية ما فيها ما يهدر جاوبات الرباط بحال هاكا :(( حادث مؤسف )).... صافي !
فكرني هاد التصريح الفرنسي بكارثة غرق الغواصة الروسية ( كورسك ) للي ماتو فيها 118 واحد و فاش سولو فلاديمير بوتين شنو وقع بالضبط ؟ جاوبهم : (( لقد غرقت )) .
بعد 48 ساعة غايتزلع الخير مازال ... ممثل اسباني ( خافيير بارديم) قال أن السفير الفرنسي في ميريكان قال ليه أن (المغرب عشيقة نضاجعها كل الليالي, ما تانبغيوهاش لكن ملزمين بالدفاع عنها ) و الخارجية الفرنسية اكتفت بالنفي وهانية. قريت هاد الزمر و قلت صافي الاعلام الاسباني و الجزائري غايديرو فيشطا و ينشطو بينا الوقت عاوتاني!
مشيت نجري درت جولة فالمواقع الاخبارية ,فالاعلام يمكن أن يجعل من حادث تافه قضية خطيرة تهز الدولة , عساك عاد حادث تصريح تقحبيني بحال هادا ؟ ممي يا ممي يا فضيحتنا كون ماشي أوكرانيا واحصاءات عدد القتلى في سوريا للي معمرين بيهم الفراغ و محركين بيهم السوق الاعلامية كون راه دارو منا زردة .
كمغاربة حنا عارفين أن نهج السياسة الاستعمارية الفرنسية التجارية واصلة لينا للعظم و حتى الفرنسيين عارفين هادشي لكن بلا حكرة و شوهة عالمية يرحم والديكم , علاش الاحتقار العلني و جرح مشاعر دولة علاش ؟
فعل الحكومة ديالنا كانت بائسة و يا ليتها قطعات الحس. راه شحال من واحد اشتهر بالوقار والهيبة غير حيت ما تايقول والو. حنا دياولنا طلقو لمصطفى الخلفي ينطق رسميا زعما و آراك للتبقبيق : ان الممثل معروف بعدائه للوحدة الوطنية ... هذه تصريحات جارحة و مهينة ... و ما الى ذلك من النواح و النكير و طبعا شويا من داكشي ديال التنديد و الاستنكار و الاحتجاج وغير المقبول... و من بعد طبز ليها العين و قلبها شحذ و توسل وتمسكين قائلا : أن المغرب و فرنسا راه بيناتهم تعزيز علاقات ثنائية و صداقة متينة زعما و احترام متبادل حتى هو و شراكة ذات منفعة , و أكد على أمله , آه الأمل , على أن فرنسا قادرة على اعتماد وسيلة مناسبة لرفع الضرر و الحيف .
نحن نتفهم أن السياسة هي فن التعامل في حدود الممكن و المغرب لاعب سياسيا في حدود ما فايتاش جوج ميترو , و نسلم أن الأقوياء هم الذين يفرضون القوانين و القواعد و حنا ما عندنا الا الانصهار و الذوبان و نستوعب و لو سطحيا أن هاد القضية ما هي الا ذيل لملفات أكبر و أعمق يمكن ربطها بنازلة القضايا المرفوعة على الحموشي وحتى بالحج الميمون للي داير سيدنا في افريقيا ... لكن كان على المغرب يبتاكر ردة فعل استعراضية ديبلوماسية قوية واخا غير ديال بالعاني باش يرد لينا الاعتبار حنا كشعب ديال جوج فرانك وصفنا السفير بأبناء الحرام حين وصف المغرب بالعشيقة , لكن الديبلوماسية المغربية أبت الا أن تؤكد على أن المغرب فعلا قحبة كبيرة .