هاد الاجواء المتوترة المشحونة اللي داز فيها المجلس الحكومي. ها كيفاش دخل اعمارة فالحيطي وها اش كال ليها العلمي وهاد باش جاوبها بنكيران وها باش دافعات على راسها: معطيات حصرية

اجواء متوترة للغاية داز فيها المجلس الحكومي. معطيات حصرية حصلت عليها "كود" بخصوص الاجواء التي مر فيها اجتماع اليوم الخميس بالعاصمة الرباط "رئيس الحكومة جا متوتر لهاد الاجتماع وكان اجتماع غريب" يقول مصدر "كود".
بيان الحكومة ما كال والو من غير "تدارس المجلس باستفاضة الموضوع المرتبط بشحنة النفايات موضوع الجدل وقررت الحكومة على أنه فيما يخص شحنة النفايات موضوع الجدل، تقرر أولا، إيقاف استعمال الشحنة الحالية في انتظار استكمال التحريات بشأنها من أجل اتخاذ قرار نهائي في حقها، وثانيا إيقاف استيراد أي شحنة أخرى من النفايات".
الميكة غلفات هاد الاجتماع، استيراد النفايات الايطالية كانت الموضوع الطاغي او الذي خلق اجواء متوترة واخا دار البيان الحكومي غير هاد الفقرة. اللي دخل بزاف فالوزيرة المنتدبة في البيئة حكيمة الحيطي هو وزير الطاقة والمعادن الشاف ديالها المباشر عبد القادر عمارة. مصدر "كود" قال ان عمارة دار تدخل قوي بزاف. جبد ليها وذنيها مزيان. كال ليها" وفق مصدر "كود" "هاد الشي ما داخلش فالاستراتيجية الطاقية اللي صايبناها" ثم اثار لها تضيف مصادر "كود" قضية المرسوم المنظم لاستيراد النفايات اللي مازال ما خرجش لحد الان بالاضافة الى اثارة هذه الاستراتيجية وعلاقتها بالتوجهات الملكية.
الحيطي بدات فالبداية بالجهد وكالت تقول مصادر "كود" ان الحكومة هي المستهدفة وبالضبط "ضرب مصداقية وزارة البيئة". حاولت تقديم اجابات تقنية. رئيس الحكومة قال ان القضية مابقاتش "تقنية" ولكن "سياسية". هاد الهدرة كان كالها الياس العماري الامين العام لحزب الاصالة والمعاصرة في حوار في دوزيم الاحد الماضي.
فالاجتماع نفسه وجدت حكيمة الحيطي نفسها محاصرة واستسلمت. الاحرار كانوا دخلو فيها وصفاو حسابات رئيسها الفعفاع صلاح الدين مزوار ووزير الخارجية اللي ما حاملهاش ف"كوب ب22″. بيان الحزب اللي كيتحرك بالتيليكوموند قال ان "حول موضوع النفايات الواردة من ايطاليا وما قد تنطوي عليه من خطورة بيئية وصحية" واضاف "انطلاقا من قيم ومبادئ التجمع الوطني للأحرار الهادفة إلى حرصه الشديد على حماية الحق الأساسي لصحة المواطنين وسلامة بيئتهم، ودرئ كل ما قد يتهددهما من أضرار. -فإنه يدعو إلى الإيقاف الفوري لاستيراد هذه النفايات حفاظا على صحة المغاربة وحماية بيئتهم التي هي اكبر رأسمال مغربي". طبعا ناضت الحيطي وزغبها الله وجبدات وزير الصناعة والتجارة مولاي حفيظ العلمي. كالت بانه على اطلاع. الوزير رد عليها وقال كيف ان وزارته تمنع الميكا ووزارة البيئة تجيب النفايات. طالب حتى هو بايفاق الاستيراد.
الداخلية ما هدراتش فهاد الموضوع فالمجلس الحكومي لا حصاد لا الشرقي الضريس تكلمو. اصحابها فالحركة الشعبية ما قدوش يدافعو عليها. دارو غير شي بركة
الحيطي خرجت خاسرة من معركة لانها اختارت منذ البداية استراتيجية خاطئة في التواصل. جبدات الصداع وخرجات للعيب مع عمارة وهمشات بنكيران وتجاوزات مزوار ف"كوب 22″ وفالاخير هي اللي تحملات المسؤولية