شكون اللي خلى الاتحاد الدستوري اللي ما عمرو يحل فمو يحتج ويكول باللي وكيل لائحة سيدي قاسم غطاوه رخصة باش يولي معاهم؟ وعلاش هاد الحزب اللي ما فيه روح كيسكت باش كيديو ليه حتى قيادتو

كلشي اللي واقع فالبلاد ينبئ بوقوع امور سيئة المغرب هو اللي غادي يخلص الفاتورة ديالها. من المؤشرات الغريبة ان حزبا مثل الاتحاد الدستوري اللي ما فيدوش ما عندو مواقف ما عمرو فحياتو حل فمو باش كيجيو احزاب معروفة وكتاخد ليه مرشحيه وبرلمانييه وما عمرو هدر وهاد الشي مستمر. اول مرة كيحتج فيها ووصلها حتى لوزارة الداخلية هي بيان كاليك "الاتحاد الدستوري ينبه الى خطورة المخطط الهيمني لحزب العدالة و التنمية".
البيان اللي توصلات بيه "كود" غريب. كيكول باللي ترشيح عبد الرحمان الحرفي٬ ضمن لوائح المترشحين باسم حزب العدالة والتنمية عن الدائرة الانتخابية لسيدي قاسم "في خرق سافر للقواعد الديمقراطية والضوابط الأخلاقية". ما كالوش واش هاد السيد مازال معاهم ولا اللا. واش استاقل ولا اللا. كالو باللي هاد الشي خطير "يتضح من خلال العناصر المتوفرة لدينا أن الأمر يتعلق بصفقة ذات طابع لاأخلاقي مؤكد , قادها رئيس الحكومة والأمين العام لحزب العدالة والتنمية بتواطؤ مع وزيره في الطاقة والمعادن من أجل مقايضة منح رخصة للاستغلال ذات طابع تجاري , كانت عائلة السيد الحرفي قد تقدمت من قبل بطلب بشأنها لم يحظى بالموافقة , مقابل قبول السيد عبد الرحمان حرفي الترشح ضمن لوائح حزب العدالة والتنمية , وغير خاف مايختزنه هذا السلوك من تسابق محموم نحو الهيمنة".
باش زاد كحلها هاد الحزب باش سمح لراسو وخلى احزاب اخرى تاكل الثومة بفمو باش تحدث على ترشيح امين عام نجيب الوزاني مع البي جي دي والسلفي بنحماد حتى هو. وكال باللي هاد الشي يدخل في "المخطط الهيمني الواضح والصريح لحزب العدالة والتنمية". حتى هاد الكلام ماشي ديال هاد الحزب. شوهة وصافي. طبعا شوهة مول العود