حرب ملوك الاغنية الشعبية تندلع بين الميلودي والداودي. استعلمو الاسلحة كلها: الاحتجاج فالشارع والاغاني والفايس واليوتوب وتشويه تصاور عيالاتهم. الميلودي ل"كود": الداودي متكبر متعجرف كيليميني وانا بوزبال ولد الشعب /فيديوهات

كود": مالك السي عادل الميلودي مع الداودي؟
راه هو اللي مالو معايا ومع فنانين اخرين. السيد جوع الكلبة وتيقها ونصب راسو ملك الاغنية الشعبية
"كود": البارح الثلاثاء كانت مظاهرة كدام دارو فالمحمدية للتضامن معاه والهجوم عليك؟
ما فهمت والو واش الناس كيظاهرو على غلاء الاسعار وعلى غزة ماشي على الميلودي. وهاد الداودي ما كيمركش وانسان ماشي متخلق وماشي مؤدب راه حتى انا كان يكمن لي نجمع جمهور الكاك وندير مظاهرة ولكن ماشي من اخلاقي
"كود": كيفاش بدا الصداع بيناتكم؟
كنا فمهرجان المحمدية. شارك فيه الستاتي وبلال وانا والداودي. باش سالى كتب بشي حاجة ديالو كيكول ليها جريدة سيمتها "جديد اليوم" باللي الداودي حقق انتصار كاسح علينا كاملين. انا رديت عليه كلت ليه الستاتي ما تقدر عليه لا انت ولا انا وجمهور المحمدية هبطك العام اللي فات باش يتفرج فبلال وانا راك ما تقدرش علي.
"كود": واش هاد الشي علاش اتهمتيه بنشر صورة مراتك بعد ما دار ليها فوطو شوب؟
عندو واحد المجموعة ديالو فيها زريقة وعماد هما اللي شدو لي مراتي وخدمو على الفوطوشوب وعراوها ودارو واحد الافريقي معنقها
"كود": باش عرفيتهم صحاب الداودي؟
سولت التقنيين اللي كنعرفهم وكالو لي هاد الفيديو اللي فيه التصاور خارج من حي النصر بالمحمدية اي فين ساكن الداودي واللي كيخدمو معاه. وراني مازال مسجل الفيديو واخا حيدوه
"كود": باش انت متأكد علاش ما تابعوش قضائيا؟
ما عنديش دليل هو براسو عارف هو اللي ورا هاد الشي. راه في ما يشد مراتو وعندي الصورة ديالها ولكن انا متخلق وولد الناس. مراتو ولا مراتي ما عندهم علاقة. عزيز علي الرجالة اللي كيجيوني فاس ماشي الرعاوين. هو كون ماشي ورا هاد الشي وماشي هو اللي سبني كون اتصل بي وكال لي راه ما عندي علاقة ولكن السيد متعجرف بعكاك وواعر