أية علاقة بين الزواج الجماعي و الانتخابات؟

الأحزاب السياسية أغلبيتها حسمت فوكلاء اللوائح الانتخابية محليا بتازة، واخا مازال كنتسناو 3 نونبر تاريخ وضع الترشيحات باش تأكد هاذ التزكيات، و الخطاب الملكي الأخير كان واضح، و منتما تعطات إشارات قوية للسلطة من العامل حتى الشيخ ، باش يحلو عينوهم ، و يحضيو الناس اللي كيد يرو الحملات السابقة للأوان،

لكن العكس هو اللي كلاحظوه حصل فتازة، فبعض المرشحين بداو كيديرو الحملات الانتخابية ديالهم على عينك أبن عدي، و خبارهم كتوصل لأعلى سلطة ، و لكن سياسة عين ميكة هي الجواب ديالها .
كاين اللي بدا كيدير الغذاوات ، و كاين العشاوات ، و كاين اللي كيدير تجمعات مغطية بالعراسات بحال اللي راحنا فعرضات عادية و موائد حاتمية كيف معروف علينا حنا المغاربة ، و ماهمهومش واش الملك قال شي حاجة أو الشعب باغي التغيير ، المهم هو المقعد واخا بتقطاع الراس .
آخر صيحة عرفتها المدينة ديال الحملات الإنتخابية هو العراسات ، فبعد الشبكة ، جات النوبة على الشروق الدرع الجمعوي ديال العدالة و التنمية فتازة ، هاذ الحزب اللي كيمارس التقية الدينية على باقي الأحزاب ، و من بعد ما تفرش فذاك الشي اللي كيديروه بعض الأئمة فالمنابر و المساجد المحسوبين على حزب اللمبا ، سامحهم الله .

و جات الدورية الوزارية واضحة بلي راه المنابر و المساجد خاصة بالدين ، ابتدعو فكرة الزواج الجماعي الذي لا أصل له فالدين ، حيث أنه لم يعرف أن كان هناك زواج جماعي لا في عهد سيد البشرية ، و لا خلفائه الراشدين و لا من تبعهم ، بل ان الديانة الوحيدة المعروفة بالزواج الجماعي هي المسيحية ، دابا جات العدالة و التنمية و بغات دير الإنتخابات بالزمارة و البندير و زوجني و اللي بغيتيني ندير ندير ، و حنا على بعد أقل من شهر .
الإشكال الكبير هو إلا كانت السلطة بجميع الأعين ديالها و كذا عامل الإقليم ما كتحضيش بحال هاذ الشيء اللي كيدوز على عينيك أبن عدي ، كيفاش غادي تحضي الغذاوات ديال نهار الجمعة حسي مسي من الجامع للدار ؟؟؟؟