اليوم الثامن للانتخابات التشريعية. الايقاع ترفع وبنكيران تبورد فتطوان والياس دارها فالناظور وباقي الاحزاب كتفرج فالماتش ولاعبة كومبارس

اليوم الثامن من الحملة الانتخابية ليوم سابع اكتوبر من الانتخابات التشريعية الايقاع ترفع. المتنافسان اللي كيضاربو على المرتبة الاولى ولاحو اللي تابعينهم٬ يتعلق الامر بعبد الاله بنكيران امين عام العدالة والتنمية والياس العماري امين عام الاصالة والمعاصرة هزو النيفو.
فيوم واحد بجوج دارو جوجت التجمعات كبار بالاضافة الى لقاءات مختلفة. بجوج عارفين ان السبت والاحد وحتي الاثنين مع يوم عطلة اللي غادين يوجهو الناخبين ويستاملوهم ويقنعوهم.
الياس العماري بدا بالناظور. عارف باللي عندو مقعد مضمون مع رئيس المجلس البلدي تماك حوليش ولكن مشى كيقلب على اكثر من مقعد. طبعا الاستقبال والحضور كان كبير. مباشرة بعد ذلك داز لوجدة فنفس الجهة. التجمع اللي كان غادي يكون فملعب ديال الريكبي دار فبلاصة اخرى وجاو الناس.
بنكيران مشى للعرائش باش يدعم الرئيس السابق للاصلاح والتوحيد الذراع الدعوي للعدالة والتنمية الحمداوي. بالنسبة لرئيس الحكومة اللي يقدر يحصل على ولاية ثانية ويقدر تسالي مهمتو يوم سابع اكتوبر تنظيم هاد المهرجان فيه حتى رد على مهرجان كان نظمو الياس العماري في نفس المدينة. بعدها طار لتطوان ودار فيها تجمع كبير بزاف. يمكن اكبر تجمع انتخابي لحد الان. دارو فمسرح للهواء الطلق.
دابا القضية تحسمات بشكل نهائي فالانتخابات: المواجهة غير بين جوج والباقي كيفرج كيشوف. من هاد الشي اللي كنشوفوه من تجمعات باقي الاحزاب راهم لاعبين غير كومبارس. حتي هما كيتفرجو شكون يجي الاول وصافي.