النكاح الاقتصادي في العالم

سمعت العدس داير 30 درهم وأنا نقول اواه ياكما لقاو فيه البترول بدل الحديد ؟؟ سؤال وجيه ملي تلقى غداء الفقراء اصبح فقط في متناول الاغنياء ، آش غادي ياكل الموظف البسيط اللي ماقادرش ياكل الدجاج ومتعود مسكين يضرب اللگط باش يعمر كرشو …
غادي نقوليكم وخا العدس ماتيقدرش عليه مسكين مول المصران ولكن راه مادة حيوية في المغرب بيه كنصاوبو الحريرة و الرفيسة والتردة اي لوغفيسا افوگل زعما الرفيسة العمية بالفغونسي ، وعندو تاريخ كبير معانا جميع ربات البيوت نهار كايوحلو ولا تايكونو غادين للحمام ومامساليينش للطياب و التبزار كيديرو مرميطة ديال العدس والكوكوت كتصفر و كولشي واكل شارب وهانية ، والعدس باش زوين ساهل ماهل و ماخاصوش يبات فازك في الما حتى للغد بحال اللوبيا البيضا ، ولكن خاصك تكوني لالة ومولاتي و تكوني شارياه و منقياه ودايراه في بلاستيكات وخا غادي نقول هنا مييييغد زيرو ميكا و ديريه في باكية تيد وخبيه للطوارئ يعني العدس بالمصرية هو ( شايلاك لوقت عوزة يا حبيبي ) اذن ملي أكلة الطوارئ اللي كتفكرنا في الحمام و الدجاج ومذاقهم الجميل في الرفيسة تولي ( اه من حلاوتك يا بلح بس النخيل عالي ) خاصنا ندقو نواقيس الخطر و نقولو واهيا ناري و اهيا سيدنا حيت احنا أي حاجة كتوقع في البلاد ماتنمشيوش لهادوك اللي صوتنا عليهم نفرعو ليهم راسهم باش يوصلو صوت الشعب المقهور للبرلمان لاااا احنا أي حاجة توقع تانكتبو بوست في الفايسبوك وتانقولو رسالة لجلالة الملك الله يخليه لينا لأن عارفينو هو الوحيد اللي تايحس بالمسكين في هاد البلاد
الموهيم هادي رسالة من هنا للمسؤولين دابا راه كاينين غير ثوارات الجياع، و البرلماني ماتيبقاش يعرف بحق الفقر حيت صافي كايتشغل بتحويل حياتو لنيڤو جديد فيه لبس ماركة وعشاوات وعراضات مافيهومش العدس، وما تيبقاوش يسولو بشحال الحولي تايجيهوم فابور من عند الجواد تمام كيفما كيجي للأرامل و المعوزين وماتيبقاش عند خوتنا خوف من الغد لأن المستقبل و العلاج والاكل والشرب مضمون حتى بعد الخروج من البرلمان، لان وايلي واش الوزير غادي يخدم گارديان ؟؟
ماديروهاش مني قلة صواب راني ماتانحسد ماتانغير ماتانقول السياسة حسن من الرقص في الخلاص راضية باختياراتي غير هو بغيت نقول للمسؤولين تدخلو واستوردو العدس باش ينزل السعر لان كاين خصاص بعد الجفاف هو السبب في طلوع السعر وانتوما تعرفو أنا غير سايرة داوية وخلاص .
رسائلي للكبار فهما لا الكبار سنا
الله يجيب اللي يفهمنا ولا يعطيناش