إسرائيل دولة بحالها بحال أي دولة خرى ، ماداخلينش معاها فنزاع ماواصلانا ماواصلينها بل العكس راه دايرة خير كبير فالبشرية من خلال اختراعاتها وتفوقها فالعديد من المجالات ، لذا زيارتها ليست خيانة للوطن حيث الى كانت هكاك فراه زيارة السعودية خيانة أكبر

كل عام المغاربة كيمشيو بالآلاف للسعودية لتأدية مناسك العمرة أو الحج أو لأغراض أخرى ، وتاواحد ماعمرو قاليهم راك غادين لدولة ديكتاتورية مكتحتارم لا حقوق الإنسان ولا الحيوان ، وأنها مجرد دولة غاصبة ، أسرة ناضت دارت الحرب على باقي القبائل وربحات ودارت دولة سماتها بسميتها ، ولحد الآن راها كتقتل فالمدنيين اليمنيين يوميا وكتمول المتشددين فالعالم والضحايا ديالها كثر من ديال إسرائيل ، وراها حتى هي دولة غاصبة لقطع من اليمن وعمان ودول أخرى مجاورة ، وطبعا حتى الى مشاو ليها صحفيين مغاربة ماغادي يدوي معاهم حد.
وفعدة مناسبات كاين صحفيين مغاربة كيمشيو لروسيا مثلا ، لي دولة شمولية بغطاء دمقراطي ، ودولة حتى هي مغتصبة لأراضي دول أخرى وعندها تاريخ دموي ، وهاهي كتمول النزاع فأكورانيا ورتاكبات مجازر فالشيشان وقرغيزيا و أفغانستان وعدة دول أخرى ، وحاليا طائراتها كتقصف فسوريا يوميا وطبعا كيموتوا المدنيين ، ومع ذلك عمرك تسمع شي جبهة اسلامية أو يسارية أو أيا كانت تقدر تخون شي وفد صحفي زار روسيا ، أو يتاهموا عدنان أحيزون وبشرى الضو بالخيانة لأن الأول كان مستقر فيها والتانية زيارتها لها تابعناها خطوة خطوة على صفحتها ومتلث البلاد فشي لعبة تم.
الوفود الصحافية المغربية تجولات العالم ، مشاو لإفريقيا لي عامرة ديكتاتوريات وحشية تبيد شعبها ، مشاو لماريكان لي دولة تأسسات على دماء الملايين من السكان الأصليين والسود المهجرين وعندها تاريخ دموي وحاضر أيضا ومستقبل ، عمرك ماتسمع شي ادانة لوفد صحفي مشا للصين الشعبية ، لي حتى هي نظام شمولي ورتاكب مجازر عديدة ، وحتى هي دولة غاصبة ، راه جيش حزب سياسي احتل البلاد بالحرب وجرا على الجيش الوطني والحكومة لتايوان لي هي دولة الصين الأولى ، ولها تاريخ فالقتل والإبادة وبنادم يتفكر غي المجازر فالتبت وربيع بكين ، ومع ذلك مكتسمع تاحد كيدوي على هادشي.
والى بقيت نسرد فالعديد من الدول لعندها تاريخ مشابه لإسرائيل أو أفظع كاع راه منكملش، ولكن المغاربة ديما عندهم حساسية بالظبط مع إسرائيل ، لي جزء منها عبارة عن مواطنين مغاربة دوزوا قرون هنا ، وعندنا معاهم هوية مشتركة كثر ملي عندنا مع السواعدة ، ومع ذلك ديما كتسمع التخوين فحق أي مواطن مغربي زار تلك الأرض الطاهرة ، والسبب أنها بلاد مغتصبة قامت على دماء الفلسطنيين ، علما أن فالجهة المقابلة كاينة غزة لي كتحكمها حماس بقبضة من حديد ، ولي حتى هي ديكتاتورية وغي ملي سيطرات على غزة راه رتاكبات مجازر فحركة فتح ، لدرجة كانوا كيشدوا منهم الرهائن كاع .
الدول عبر التاريخ مكتأسسش بالديمقراطية ولا شي واحد كيقطع شي طرف ديال الأرض كبير من شي قارة ويقول لشي مجموعة بشرية يالله عيشوا فيها ( دارتها ميريكان مع ليبيريا وماصدقاتش)، الدول كتأسس بالحرب والقوة وعلى أنقاض دول أخرى وفوق جتث الناس والمهم هو النتيجة ، والتاريخ الدموي ديال إسرائيل لا يختلف عن أي تاريخ العديد من الدول ، فقط اسرائيل ثم شحن المغاربة والعرب والمسلمين بالخطاب الإسلامي اليساري القومي العفلقي طيلة سنين ، حتى مابقاتش عند العديد من المغاربة نظرة موضوعية للأمور ، وتكونات عندهم هاد الحساسية من إسرائيل والتطبيع وأثرات صورة محمد الدرة عليهم كثر من صورة الطفل الفلسطيني لي تذبح فسوريا وهو عندو غي 12 عام ، راه إسرائيل دولة بحالها بحال أي دولة خرى ، ماداخلينش معاها فنزاع ماواصلانا ماواصلينها بل العكس راه دايرة خير كبير فالبشرية من خلال اختراعاتها وتفوقها فالعديد من المجالات ، لذا زيارتها ليست خيانة للوطن حيث الى كانت هكاك فراه زيارة السعودية خيانة أكبر ، علما أن المغرب تضرر بطريقة مباشرة عبر الإنفجارات الإرهابية لي وقعات فيه ولي كانوا المنفذين ديالها متأثرين بالدين السعودي الوهابي ، ولي ساهمات بشكل مباشر من خلال الفلوس باش تمول العديد من الحركات وتنشر الفكر الظلامي لي تقاس منو المغرب مباشرة .