بسباب الفيزازيين و الفيزازيات لي كايشوفو الطلاق و العنوسة ك "معيورة" ناس بزاف مزوجين عايشين وسط الكذوب و العنف و الخيانة و ساكتين !‎

فين ماكان شي واحد قلبو طايب من جيهة العيالات القادات ! واقفين ليه فحلقو دوك العيالات لي اصلا ماكاينتاميوش لنفس الخلفية الاجتماعية و الثقافية ديالو كاينوض يعايرهم "زعما" بالعانسات المطلقات! اه زعما لي مزوجات راه مطفرينو السعادة غا مشتتة عندهم! سي الفيزازي واحد من الناس لي خرج لينا مؤخرا بواحد المنشور فالفايسبوك كايتسائل علاش كاع العيالات المناضلات فالجمعيات النسائية مطلقات او عانسات ! فحالا السيد عندو السيفيات ديال كل وحدة فيهم ! و عارف التاريخ و الاصل و الفصل ديالها …
هاد الهضرة طبعا ماكايقولهاش غير الفزازي … فيزازيات هوما عندنا فالبلاد كايتخايلو المرأة موديل واحد ! سطوندار ! داك الموديل لي كبرو حداه ديال مو و ختو و عمتو … ديك المريوة الحشومية " الداخلة سوق راسها" لي واخا تكون خايبة و لا مكلخة كاتسمعهم كايقولو عليها " وااا خويبة و لكن حادكة تبارك الله" "واا ماقراتش شي قراية و لكن دريوشة و بنت الناس" " وا هي الصراحة ماشي شي زين و لكن بنت دارهم" ! دوك العيالات المتوسطات ! المتوسطات في كلشي ! في الذكاء و في الجمال و في الشجاعة و في الجرأة ! داك النوع لي فاش كايشوفوه امثال الفيزازي كايرتاحو ! كايحسو بديك المرة "قد يديهم" ! و شحال من مغربي اصلا ماتزوجش بصاحبتو حيت حس بيلا " ماشي قد يديه" و خدا بنت خالتو و لا بنت دربهم ديك "الدريويشة "! القطة المغمضة ! ديك الصبارة لي تصبر ليه على هبالو و حماقو و واخا يكون لي كان(زعما يخونها، يضربها، يشرملها، يتكرفص عليها) غاتبقا صابرة معاه ! "الله على راحة" كاتحسو بيها مع هاد النوع ديال العيالات لي كاتاخدوهم و كاتاخدو معاهم تيكيتة مكتوب فيها الكارانطي "garantie à vie" ! و لتحت مكتوب بحروف صغيورين " دير فيها لي بغيتي و ماتخافش! راها "بنت الناس"! فالمقابل اي مرا مختلفة راه كاتشكل ليهم تهديد !اي مرا كاتهضر هي تهديد كبير و خطير
! تخايل معايا كاع العيالات يقتانعو واحد النهار بأنهم ماشي بزز منهم خاصهم يكونو داك الموديل لي طراساوه ليهم الفيزازيون و الفيزازيات ! تخايل معايادوك الافكار " المسمومة" ديال الحرية !يدخلو ليهم للدماغ … تخايل معايا كلهم غدا يوليو مستقلات ماديا و حرات في الاختيار ! اختيار اللباس و نمط العيش و شنو دير و شنو ماديرش و بيمن تزوج و معامن تتصاحب ؟ تخايل هادشي يوقع ! راه تهديد كبير لاخواننا الفزازيين !
الفيزازيون بغاو كاع العيالات يحنيو الراس و ماكرهوش تاوحدة ماتخرج ! تا وحدة ماتخدم ! تاوحدة ماتتشكى و تغوت " واا العاداو راكم طلعتو فالراس" ! طلعتو فالراس بالتخلف و الجهل و التحكم و التسلط الخاوي! صافي لي سالاو ليه مع العيالات كايعايرهم بالعنوسة او بالطلاق ! اه على اساس لي مزوجات راهم عايشين السعااادة ماخاصهم تاخير!!باش نوضحو الامور الزواج بحد ذاتو راه ماشي شي حااااجة صعيبة جدا !! راه كايتزوجو البنات ديال 16 لعام و العيالات ديال 40 عام ! كايتزوجو القاريات و لي ماقارياتش ! الخدامات و الجالسات فالدار ! كايتزوجو الزوينات و الخيبوعات ! الموسخات و النقيات ! الحادكات و المعفونات … كايزوجو كل عام مئات الالاف من البنات من جميع الالوان و الاشكال و الخلفيات و المستويات و من بعد ؟ واش كلهم سعيدات فحياتهم ؟ كلهم راضيات على اختياراتهم !؟ شحال من وحدة فيهم شادها غا الولف؟ شحال من وحدة فيهم صابرة غي "على وجه الوليدات"؟ شحال من وحدة هاد الليلة نعسات باكية حيت فرشخ عليها "زمانها" التلفزة و النيميريك و المويعنات لي شرات بفلوس دارت ؟! شحال من وحدة اليوم مزوجة ! نعسات منهصرة هي وولادها حيت "راجلها" سكر و خلطهم كاملين ؟! شحال من وحدة تاجمعات الباليزة و تفكرات ماعندها فين تمشي !! عندمن غاتمشي و شكون غايقبل عليها بولادها و تتسمى عليها "مطلقة" و حطات الباليزة و ردات الحوايج للماريو و ناضت تعجن المسمن في انتظار يجي "المسخوط" كيما كاتسميه فاش كاتكون كاتهضر مع صحاباتها باش يعجنها هي و المسمن؟! شحال من وحدة من هادوك لي مزوجات اليوم ماكرهاتش تغوت و ماقاداش ! ماقاداش حيت الفيزازيات كثار ! الفيزازيات لي كايساينوها غي تقول "اح" باش يطيحو عليها يفرسو فيها! بسباب الفيزازيين ناس بزاف عايشين وسط الكذوب و الخيانة و الألم و العنف و ساكتين … ساكتين حيت مازال كاينين ناس ف2015 كايشوفو الطلاق ك معيورة! راه ماشي غير اجي و كون "مطلقة"! فالمغرب! راه خاصها تكون لالة و مولاتي باش تعرف توضع حل لراسها و لحياتها و تقول "سطوب"! حبس ! راه وصلنا لمرحلة اللاعودة ! من الاحسن نتفارقو و كل واحد يعاود يبني حياتو…و تتحمل امثال الفيزازي لي كايشوفو المطلقة مجرمة فحال بوصمة !
و ملخر مطلقة و لا عانسة و لا مسترجلة اش هاد المستوى ديال الهضره !؟ا سيدي كولا يديها فراسو! راه كلهم العيالات اليوم مزوجات و عانسات و مسترجلات و جميلات و مطلقات و عازبات و محجبات و سافرات ماكرهوش يقولو ليكم يا معشر الفيزازيين" عطيونا التيساع " … ‘سدو دلاقشكم" و ديوها فالجهة ضاراكم شوية ! المعركة د العيالات راهم قادين بيها ! خلاوها المصريين غير "نقطونا بسكاتكم"