سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
علاش كايحاربو حكيمة الحيطي ؟ الوزيرة البوكوصة ! علاش اعداء الجمال كايعجبهم يشوفو المرأة المغربية حانية على الفراكة و ماكايحملوهاش تبان زوينة و مهلية فراسها؟
المشكلة فالهضرة لي قالت الوزيرة حكيمة الحيطي ! ماشي هو ديك القضية ديال 22 ساعة ديال الخدمة لي دوات عليها و لي باينة من الطيارة راه غير une façon de parler و صافي ! ماتستاهلش الواحد يركب عليها باش يخرج كاع داك الحقد و الغل لي كايحس بيه اتجاه ديك السيدة ! النقاش ديال 22 ساعة متجاوز حيت حنا اصلا المغاربة كانزيدو فيه ! المشكلة الكبيرة هي داك الهجوم الواسع لي تعرضات ليه السيدة من عند الهايش مايش ولي ركزوا على الشكل ديالها و على شنايفها بالخصوص… الهايش مايش لي نورمالمو خاصو يكون فرحان لي عندو وزيرة فالحكومة مهلية فراسها ! ا سيدي دير البوطوكس و تنفخ شنايفها و لا تفشهم و لا تعاود نيفها شغلها هاداك راه بالعكس خاصنا نكونو فرحانين لي عندنا وزيرة بوكوصة مهلية فراسها ! و لكن طبعا بنادم ماموالفش بالخير ! نسا بيلا السيدة قبل ماتكون وزيرة راها مرا بالضرورة ! انثى ! تاهي كاتهلى فراسها و كاتصبغ ضفارها و كاتلبس مزيان و كاتقاد حالتها فحال كاع العيالات لي قدها و فالمستوى ديالها ! عادي جدا ! المستوى ديالها كوزيرة كايسمح ليها تلبس مزيان و تتهلا فراسها و دير البوطوكس و التجميل شغلها هاداك و حياتها الخاصة هاديك ! الشعب كايتسالها تخدم ! دير داكشي لي كاتخلص عليه ! اما تنفخ شنايفها و لا تفشهم هادشي ماشغلناش فيه حياتها و راسها وشنايفها و هي حرة فيهم ! ولا كاين شي قانون كايفرض على الوزير يدير استفتاء شعبي قبل ماينفخ شنايفو وريوه لينا ؟! الهايش مايش خاصو يدخل سوق راسو شوية ! حكيمة الحيطي تمثل المرأة المغربية ديال اليوم لي بغيناها تكون زوينة و بوكوصة و قارية و شادة بوسط مزيان ! و لا لا ؟ هاد النموذج ديال مرا واصلة و بوكوصة ماعندناش معاه ؟ الهايش مايش كايعجبو غا التصاور ديال دوك العيالات فالجبال هازين الحطب و التصاور ديال شي مرا كاضرب الكرفي و لا حانية على فراكة و كاتصبن فحال هاد التصاور فالفايسبوك كايجيبو الاف الجيمات و التعاليق حيت ماليهم كايكتبو "كم تستحق هذه المرأة المكافحة من جيم؟" فحالا زعما المرا مكتاب على طاسيلت مها تكون مكافحة ! وجه تامارا و الحطب و الصابون و الفراكة ! هادشي ما سوات المرأة المغربية فمخيلة بزاف ديال الناس ! تتصور مهلوكة ! وجها محروق بالشمش و لابسة دربالة باش تتسما " المرأة المغربية الحقيقية " فحال لا المرأة المغربية باش تكون حقيقية و تستحق الاحترام و التقدير و الجيمات خاصها تكون مقودة عليها ! صفرة و عيانة و مشكردة ! زعما هاديك المرأة لي مهلية فراسها و لابسة مزيان و دايرة البوطوكس ماشي مغربية لا تستحق الاحترام و التقدير ! تامغربيت ديال المرا و الاستحقاق ديالها مرتبط بالمدى الزلط ديالها وواش مقودة عليها ؟ لا مقودة عليها اوك تستحق الاحترام ! مامقوداش عليها ضروري نطلقو عليها الهايش مايش يعايرها و يسبها و يفجر الكبت ديالو و الحقد الطبقي عليها ! اسيدي على هاد الحساب اصالة عن نفسي و نيابة على كاع العيالات لي عندهم شوية ديال العقل ( موخنونات و فاتيفلوغات و لحاسات الكابة ماداخلينش معانا) كانقول راه حكيمة الحيطي تمثلنا! فخر الصناعة المغربية ! و تاحنا بغينا نفخو و نفشو و نديرو التجميل و نتهلاو فراسنا و لا كان الاعجاب و الحب و الجيمات غانجيبوهم غا بالفراكة و الصابون و التحرتيك الله يسامح ! بصحة و الراحة ! انا مابغيتش نتصور كانضرب الكرفي باش نتسما امراة مغربية مكافحة غااا بالصحة! و حتى هاديك المرأة لي كاضرب الفراكة واخا تشوفوها كاتبتاسم فالتصويرة راه ماشي فرحااانة و ناشطة راه تاهي طالع ليها الزلط فراسها و ماكرهاتش تشري ماكينة د الصابون تهنيها من العريك و الفريك و التشلال و تمشي لأقرب عيادة تجميل تقاد و تصايب و تنفخ و تفش ع الله و عسى يصلح الجراح ما افسدته الفراكة ! فهنيئا لنا بحكيمة الحيطي كوزيرة بوكوصة ! و تبا للهايش مايش لي كايحاربو الزين و الجمال فين ماكان !
