التاريخ حافل بعدة مجازر وسلوكات وحشية قامت بيها شعوب تعتبر الآن قمة فالتحضر، وهادشي الا قارنتيه بما تقوم به داعش، غادا يبانو ليك غي دراري صغار كيلعبوا

هاد ليامات كنمارس هواية التدعدش بالليل، يوميا كندير جوج ساعات أو أكثر ديال مشاهدة فيديوات المجاهدين فالعراق وسوريا وحاليا حتى ليبيا، ومرة مرة كنلوح شي واحد عندي فالفايس، وكيما العادة فالغالب كاينين جوج آراء لي كثيرة، الرأي الأول كيقول داعش لا تمثل الإسلام، والإسلام بريئ من هاد الممارسات الحيوانية، اللاإنسانية ديال داعش، وأن الإسلام دين رحمة وسلام وحووب، وكاين الرأي التاني لي زعمة كيتحسب حداثي تقدمي، ولي كيعتابر أن داعش هي الإسلام الحقيقي، وأن داعش مكتجيب والو من راسها بل تابعة سيرة السلف الصالح فالتقتيل والتهجير.

كاين الرأي الثالت ولكن قليل، وهو أن السلوكات لي كتقوم بيها داعش أو غيرها، راها فالأصل سلوكات بشرية مفرطة في انسانيتها، ومامحتاجش الإنسان لإيديولوجية معينة باش يقوم بمثل تلك الممارسات، واخا هو الصراحة الإيديولوجية كتنفع لإقناع الرعاع بنبل ما يقومون به من ذبح وسحل وتقتيل، وعلى خلاف من يعتبرون أن أغلب الداعشيين هم من المكلخين البوزبال والمجرمين، فالواقع غير ذلك فهناك حالات عديدة لمهندسين(كاين واحد مغربي كنعرفو) وأطباء وناس متعلمين مزيان كثار، وباركة عليهم غي أن أبي بكر البغدادي عندو دكتوراه على خلاف رئيس حكومتنا كاع، بالإضافة الى أنهم في حالة حرب مع العالم وفالحرب كل شيئ جائز.

هادوك لي كيعتابرو أن ما تقوم به داعش يعكس تخلفنا كعرب وكمسلمين، ويعكس مدى دموية هذا الدين، وكيستغلوا هادشي ويبداو يديرو مقارنات مع دول أخرى لي كتعرف حاليا نوع من الرقي والحضارة، علما أن التاريخ عموما حافل بعدة مجازر وسلوكات (وحشية) قامت بيها دول وشعوب تعتبر الآن قمة فالتحضر، وهادشي ماشي بعيد والى قارنتيه بما تقوم به داعش، غادا تبانليك داعش غي دراري صغار كيلعبوا قدام العنف اليباني مثلا.

يمكن لأي واحد يكتب فكوكل مذبحة نانجنغ أو اغتصاب نانجنغ وأرى مايقرى ويشوف فالتصاور ديال عمليات قتل وابادة داروها اليابانيين فحق الصينيين، لا تقارن بمدى ابداعها وتطرفها بما تقوم به داعش حاليا، مدينة على قدها تمت ابادة أغلب سكانها ما يقارب 300 ألف نسمة، تدفنوا أحياء، وثم التمتيل بالجثت ديالهم، 20 ألف غي من الفتيات والنساء والعجائز لي تم اغتصابهم وقتلهم طعنا، وتقطيع أطرافهم ورميها فالشارع، ووصلات بيهم أنهم شدو طفل قطعوه وحيدوليه قلبو وحطوه على جثة الأب ديالو والأم ديالو كتشوف من بعد اغتصبوها وقتلوها طعنا بالحراب، اليابانيين كانوا كيعتابرو الصينيين بخوش وكيقولوا أن القرطاس خسارة فيهم، لذا كانوا يفضلون طعنهم بالحراب، أو قطع رئوسهم بالسيف ، أو دفنهم أحياء، وكاينة صورة لجنرالين تخاطروا على شكون يقطع مئة رأس بسيف واحد قبل من لاخور، وابتدعوا ممارسات للتسلية، بحال تطلق الأسرى فشي حقل ديال الألغام ويتخاطرو بيناتهم شكون غيوصل من بعد كيعطيوهم ليصانص ويحرقوهم أحياء، وهاد الأمر انتقل لآسيا فيما بعد وظهر هاد المشهد ففيلم رامبو4، وكاين العديد من هاد الممارسات لي قامت بيها شعوب وبلدان مامسلماش وبلا ماتتسنى الحوريات والجنة، حيث القتل هو سلوك بشري ممحتاجش حوافز وإنما بيئة ملائمة لا غير.

مادارت بلجيكا فالزايير حتى هو راه داكشي ديال داعش يبان غي تخربيق معاه، والإبداع لي قاموا بيه فرق الموت فأمريكا اللاتينية المدعومة من ماريكان، حتى هو راه من أقصى ما وصله انسان العصر الحديث من إبداع فالتشريح، الناس كانوا كيشدوا أسرة مثلا ويذبحوها، ويجمعوها على طاولة الطعام، ويحطوا ليهم راسهم فالطباسل، وكيديروليهم فورشيط وموس وفيديهم، باش يبانو بحال الى كياكلو روسهم، بالإضافة الى نشر الجتث المقطعة طراف فالشوارع العامة لإخافة الناس، اللاتينيين عموما كانوا مبدعين فالقتل فالأرجنتين مثلا اخترعت رحلات الموت، اي من بعد يقال أن الجزائر اقتبستها منها، وغي خوتنا الجزائريين آش دارو فالقرى ديالهم من ذبح وسلب ونهب واغتصاب، وكبرنا حنا على أخبار ميدي1 اليومية حول عدد القتلى وطرق القتل.

داعش ماشي شي حاجة غريبة وداكشي لي كيديروه، راه أمم عظيمة دارت ما كثر منو بالمضوبل وغي فبعضياتها كاع كالحرب الأهلية الأمريكية، الفرق هو أن بحال فرق الموت فأمريكا اللاتينية كانوا كيحاولوا يخفيو أثار جرائمهم ونسبها لناس خريين، بينما داعش تفتخر بالأمر وكتصورو وكتحطو فاليوتوب، داعش جزء من التاريخ البشري المجيد في القتل، الفرق لي كاين ولي مخليها مرعبة بحال هاكة هو أنها بجودة آش دي، أما راه كون كان بول بوط كيصور جرائمه فغادا تبان داعش حداه غي مبتدئة.
فالنهاية الأمر لا يتعلق بالإسلام أو العروبة، الأمر كيتعلق بسلوك انساني عادي جدا، مصور بتقنية آش دي.