عبثية تشكيل الحكومة: ها فين كاين المشكل وها كيفاش تحاصر رئيس الحكومة المعين وقطعو ليه التحالفات

الحكومة مازال ما تشكلات وماغادياش تشكل فالقريب العاجل. هاد الشي على الاقل ما كيبان. ولكن واش بنكيران بوحدو كيتحمل مسؤولية تآخير اعلانها منذ تعيينه بالدار البيضاء يوم 9 اكتوبر الماضي؟ طبعا اللا. حقاش كان سيناريو اخر موجد وكون صدق كون الحكومة تم تعيينها فاسبوع. باش نجح ضمسات الكارطة.
رئيس الحكومة المعين عبد الاله بنكيران خرج بتصريح قال ل"كود" انه سيبدأ المشاورات مع الاحزاب التي كانت تشاركه التحالف في الحكومة السابقة. اي كان غادي يبدا التشاور مباشرة بعد التعيين مع الاحرار والحركة والتقدم والاشتراكية. كافيين لتشكيل تحالف جديد فايت 198 مقعدا فالبرلمان الحالي. القصة عارفنيها. اول تقوليبة تقولب فيها بنكيران جاتو من الاحرار. كالو ليه باش اتصل بصلاح الدين مزوار اللي كان حينها رئيسا ثم رشيد الطالبي العلمي عندنا مؤتمر استثنائي. كان خرج بلان عزيز اخنوش رئيسا للحزب. كان على بنكيران يتسنى حتى 29 اكتوبر موعد المؤتمر. حقاش كال خاصني ولا بد نستاشر مع الاحرار. الحركة الشعبية دارت نفس العملية، بطريقة مفاجئة كالو غادين يديرو مجلسهم الوطني فنفس النهار ديال المؤتمر الاستثنائي للاحرار 29 اكتوبر.
بنكيران ما بقى ليه غير يكمل مشاوراتو. ضمن التقدم والاشتراكية والتقى بالاستقلال اللي قبلو يدخلو وشكل مفاجئة كبيرة وغير حميد شباط امين عام الحزب خطته واصبح يهاجم البام بعد ان كان حليفا له. فهاد الساعة كان باقي لتشكيل الحكومة اقل من عشرين مقعد ان كون الاتحاد الاشتراكي قبل المشاركة كانت حكومة بنكيران تكتمل وتبدا المفاوضات على المقاعد ووووو
فهاد الفترة كان اتصال بالاتحاد الاشتراكي وقبل يشارك فالحكومة غير المشكلة اللي طاح فيها بنكيران هو انه قال غادي ينتظر حلفاؤو السابقين: الاحرار والحركة الشعبية. هنا سقط فالخطأ. لشكر كان مع فكرة الاعلان على تحالف بين مكونات الكتلة سابقا والبي جي دي دونما حاجة لشي حزب ولكن انتظار بنكيران للاحرار غادي يصعب مامورية تشكيل الحكومة. حقاش فهاد الوقت لشكر تراجع على قرارو المشاركة لانه ما عمرو كالو علانية. وبدات مفاوضات لاقناعه. الاحرار مع رئيسهم الجديد تلاقى مع بنكيران وجها لوجه يوم 30 اكتوبر وتسرب من اللقاء ان هناك شروط وضعها اخنوش للمشاركة في الحكومة منها استبعاد فكرة دعم الفقراء واستبعاد حزب الاستقلال. عزيز اخنوش صرح ل"كود" انه ما كالش استبعاد الدعم للفقراء. القضية شعلات وكانت معارك على الفايسبوك وفي الصحف ومازالت.
الحركة الشعبية قالت انا مع الاحرار فين ما مشى نمشي معاه.
دابا شكون المسؤول على تاخير هاد الحكومة واش التماسيح والعفاريت والجنون ولا الاحزاب السياسية ولا اللي كيسير هاد الاحزاب السياسية فالخفاء. هاد الشي راكم عارفينو وكل واحد وعندو سبب ديالو.
دابا جا الخطاب الملكي فداكار وتكلم على تشكيل الحكومة وكال خاص الجدية وخاص وخاص ولكن هاد الشي كلو يحتاج اولا لتشكيل الاغلبية. الاغلبية مازال ما كملاتش واخا الاتحاد الاشتراكي كال قابل يشازك، مازال ما دارتش بيان