واش السي اليزمي والطوزي بغاو يتزادو على مسيرة كازا الفضيحة ودعم الباطرونا ووواللي ساهم فتقوية العدالة والتنمية؟ الاول ما شافتش مسكين اعوان السلطة كيوجهو الناخبين والطوزي خلق فصل فالدستور بحال ايلى المغرب ملكية برلمانية

باين كاينة فئة فهاد البلاد ما بغاتش تتعظ من كلشي اللي وقع. وراه المغاربة صوتو وكانوا واضحين وسالى الماتش. علاش عوض الاعتراف بالهزيمة كيف دار السي مزوار اللي خاصو يتحتارم دابا على قرار الاستقالة لانه خسر٬ بدات سيناريوهات بليدة لناس محترمين.
قبل الحديث على ما قاله الباحث اللي كان من الناس اللي صاغو دستور 2011 محمد الطوزي نشوفو اش كال واحد السيد غادي ويمس فمصداقيتو اللي هو ادريس اليزمي رئيس المجلس الوطني لحقوق الانسان. السيد ما بان ليه فهاد الانتخابات اللي راقبها الا "التشكيك المسبق في نزاهة" انتخابات الجمعة٬ في اشارة الى موقف حزب العدالة والتنمية. دابا واش انت وليتي حصاد جوج. راه وزير الداخلية سبهم وشوه كاع وبان باللي كاعي حقاش البي جي دي ربح الانتخابات. هاد الشي اللي بان فالندوة الشهيرة. انت مراقب اش داك تناقش ما هو سياسي. ماشي من حقك يا سيد حقوق الانسان اللي وليتي حاضر فكل نشاط دولي من المناخ حتى الطاقة الشمسية٬ ديها فحقوق الانسان.
السي اليزمي فحال ايلى عايش ففلندا كاليك كان استعمال المال فشراء الاصوات والمساجد في استمالة الاصوات وحصرها ف37 حالة فقط. الواعرة فهاد الشي كلو٬ ان اليزمي قال باللي تدخل اعوان السلطة كان محدودا يالله مثل 0.3 بالمائة. واش السي اليزمي عايش معانا. اكيد عندو عائلة وهو نفسو ايلى دار دويرة غادي يعرف لمقدمية والشيوخ اش دارو هاك اليوم.
اليزمي بان متحيز باغي يرجع المجلس طرف وخدمتو الحياد باش تقدم لبلاد. محاربة كل اشكال الظلام تبدأ بقيام كل واحد بخدمتو مزيان.
الشخص الثاني هو مثقف كبير خاصو يبقى محترم وهو محمد الطوزي. كال ل"تيل كيل" ان حزب العدالة والتنمية ايلى ما قدرش يشكل حكومة يقدر يولي "شاهد" اي يدوز الملك للحزب الثاني اللي هو الاصالة والمعاصرة ويرجع العدالة والتنمية للمعارضة. هاد الاختيار اولا ضد الدستور هو يقول ما كاينش فالدستور ما يقول هذا ثانيا يحتقر كاع لمغاربة اللي صوتو ثالثا وهذا هو الخطير واش السي الطوزي كيصحاب ليك حنا اسبانيا بلا ما نكولو دول اخرى؟ اولا نتسناو تعيين الملك لرئيس الحكومة علاش هاد الموضوع المقدمة فتشكيل الحكومة حتى حد ما باغي يهدر عليه. كلشي كيهدر على تشكيل الحكومة. اسيدي خلي الملك يعين بنكيران رئيسا للحكومة او اي شخصية من حزبه كما يقول الدستور ونشوفو. هادي حكومة صاحب الجلالة وانت عارف كلشي الاحزاب تقريبا باغية تدخل للحكومة ومع العدالة والتنمية من الاستقلال الى التجمع والحركة والتقدم والاشتراكية وحتى الاتحاد الاشتراكي. ثم واش هاد الاحزاب عندها قرارها السيادي فهاد الشي؟ ايلى جاتهم توجيهات يطبقوها ايلى ما كالو ليهم والو غادين يدخلو بعينيهم مغمضين لهاد الحكومة.
بحالكم يا اليزمي والطوزي كتقويو الاسلاميين ومن هنا كيبان حتى 2021 ديالهم وبمقاعد اكثر. باراكا ما تبيعو واقع ما كاينش لجهات فالدولة. راه الدولة عارفة بمعطيات دقيقة اش واقع، المشكلة هي مشكلة صورة داروها لمغاربة على فئة كتدخل فقيرة وكتولي ملايرية فظرف قياسي وما كتبان الا فالانتخابات. راه العدالة والتنمية مازال لحد الان كدور على الديور تشكر اللي صوتو عليهم واش دارو بحالها اللي كيكولو راهم حداثيين مرتبطين بالشعب؟ باراكا علينا من التخربيق