انتخاب دونالد ترامب رئيسا للولايات المتحدةالامريكية سيغير الخارطة العالمية. كاع الديكتاتوريين فالعالم تقريبا غاديين يفرحو. الرئيس الجديد ردد فحملتو الانتخابية انه غادي يديها فشغلو ويديها فامريكا ويبعد عن العالم ومشاكلو. همه شعبه ورخاء شعبو ماشي يبقى جدارمي العالم. هاد الشي غادي يعجب بوتين فروسيا والسعودية وكوريا الشمالية وتركيا اردوغان…. الرئيس السابق باراك اوباما خلى جرح كبير فملفات كثيرة. مشاكل كثيرة بسبب سياسته الخارجية. المغرب من الدول اللي غاديين يستافدو من هاد الرئيس. ديما علاقة المغاربة مع المحافظين الامريكيين اللي كيمثلهم الحزب الجمهوري مزيانة من بوش وقبل. مع ترامب غادي يكون نفس الشيء. هاد الشي علاش حميد شباط الامين العام لحزب الاستقلال اللي حضر لتنصيب ترامب وتزكيته مرشحا لحزبه قال انه سيكون في صالح قضية المغرب الاولى اي الصحراء. عانى المغرب كثيرا من ادارة اوباما خاصة سوزان رايس وسامانتا باول اللي دافعو بشكل كبير على توسيع صلاحيات المينورسو في الصحراء لتشمل حقوق الانسان. المغرب خرج من هاد القضية بشق الانفس. مازال كيعاني دابا. دابا مع الرئيس الجديد كلشي غادي يتغير. غادي يكون احسن من هيلاري كلينتون كون ربحات. حقاش كلينتون كانت غادية تبقى محافظة على سياستها الخارجية بوجوه لها نفس الفلسفة ديال سوزان رايس وسامانتا باول. اللي غادي يمس المغرب ولشكل ماشي خايب بزاف هو انه كينظم دابا "كوب 22" فمراكش. ادارة اوباما كانت التزمت بالحد من انبعاث الغازات السامة الملوثة للكرة الارضية. حملة ترامب كانت مع اعادة امجاد امريكا فالتصنيع وكان ضد قرارات اوباما. يعني ان هناك تغيير ب360 درجة للادارة الامريكية. طبعا الخاسر فهاد الشي الاممالمتحدة ماشي المغرب. غادية غير تحسب على مراكش وصافي
