شوهتنا عالمية. مغربيات يرددن "بالروح بالدم نفديك يا سعد" اللي متهم بالاغتصاب. علاش وصلنا لهاد الحالة اللي المغربيات كيدافعو على مغتصب متهم ويحتجو على قضاء دولة كلشي كيثيق فيه حتى الملك اللي ورطوه فهاد الفيلم

يوم امس الاحد مع الثلاثة فالدار البيضاء ناضو شي وحدين قالو ظاهريا راهم مواطنين من عشاق سعد لمجرد دارو وقفة قالوا باللي تضامنية مع سعد المجرد المتهم بالاغتصاب واللي مشدود دابا ففرنسا. المثير ان غالبية المشاركين بنات. باينة ان الجهة المنظمة ما تكون غير عندها علاقة بمنتج الفنان باغي يعطي صورة غير صورة المغتصب عن هاد الفنان اللي اكثر من شهر وهو فالحبس ضاحية باريس.
هاد المشاركين فالمسيرة رفعو شعارات اكثر عبثية من هاد الوقفة كلها. كالو "بالروح بالدم نفديك يا سعد" ورددوا "انا ماشي ساهل" وصلاو سلمو على الرسول كاع وزغرتدو. العبثية فهاد الوقفة ان غالبية الحاضرين اللي كان قليل بزاف من لبنات. السؤال اللي خاصو يتسولو واش تقلبو تتعرضو للاغتصاب من قبل سعد لمجرد وتسامحو ليه؟ سؤال مستفز ولكن الاستفزاز هي الوقفة. ثم فين دارت. اش لاح القنصلية الفرنسية للقضاء الفرنسي. اش هاد الغباء واش كيصحاب ليكم راسهم هادا المغرب وكلشي مخشي فكلشي واستقلالية القضاء حلم مازال بعيد. راه فرنسا ايلى القنصل خرق القانون غير القانون ماشي الاغتصاب٬ غدا يلقى راسو فالبنيقة حدا سعد لمجرد. راه القضاء اللي سخسخ رئيس فرنسا السابق ساركوزي واستمع ليه وحقق معاه وما ناض حتى شي حد من اتباعو اللي كثار زعم ولا فكر ودار وقفة.
شوهتونا الله يشوهكم. زكيتو ديك الصورة الخايبة اللي كتحاول الدولة تحيدنا وهي ان المغرب اللي عندو صورة ماشي مزيانة على الاغتصاب والبيدوفيليا وووو. زكيتو دوك الربورطاجات الخايبة علينا فهاد الموضوع.
وقفة تسيء للمغرب تسيء للعدالة تسيء للمرأة تسيء لينا كلنا حقاش القضاء مازال ما قالش كلمتو ولحد الان ما كاين حتى شي واحد من عائلة سعد لمجرد ومحاميه نشكك ولو مرة فالقضاء اذن هما تايقين فيه حتى الملك محمد السادس تايق فيه وعليها دار محامي خدم معاه فقضية الصحافيين المبتزين ومعروف باش يدافع على لمجرد. المصيبة ان شي وحدين البارح فالوقفة ساءوا للملك باش ربطو اسمه بالمجرد من خلال هاد الشعار الغبي "ملكنا عزيز علينا وبغينا سعد يرجع لينا". علاش كتوظفو الملك فهاد الفيلم لعوج؟