الدارجة وتخربيق عيوش: يا إما الدولة تتحممل مسؤولياتها يا إما هاذ خيينا ديال عيوش يززم دركًومو ويخللينا عليه في التيقار…واش المثقفين تسنناوك آ المعللم باش يكتبو باللغة المغربية الدارجة ؟؟

عبد اللطيف اكنوش استاذ باحث في جامعة الحسن الاول ////
للي كايحساب ليه نور الدين عيوش غير "un fou du Roi" وغير كايخربق، راه هو المسطي وهو للي مكبوبة عليه الكًففة ! "ديكسيونير" لاش في ناظاركوم؟!!!
عيوش كايكًول للعام والخاص أنه صاحب ملك البلاد…طيب..وهو مامنحققوش، لأن هاذ "الستاتو" كايعطيه، في عينين الناس، البساط منهو وللي ماشي بساط، واحد المكانة للي فوق الأخلاق، وفوق القوانين، وللي أي واحد دخل معاه في شي "كونطاكت"، لازام يدير بحسابو شعوريا أو لا شعوريا…ماعلينا..ولكن دخلو هاذ المعطى في الأشياء للي غادي نكًولها من بعد…
السيد هاذ مدة طويلة وهو كايدافع على "لغة الأم"، للي بالنسبة ليه هو بالأساس هي "الدارجة"…ولأجل هاذ الغراض، دار ليها مؤسسات ودار ليها جمعيات وجمع ليها الفلوس للي ماشي سهال لأي قمقوم أنه يجمعها، ويدير منها مشروع بمساعدة الدولة نفسها..لأنه مايمكنش لشي والي جهة أو عامل عمالة يكًول ليه: "آجي آ المعللم، آش كاتبخنس؟ ولاش كاتبخنس؟" ! السيد مشى للمناطق النائية للي الدولة دايرة عليها ميكة، ومن تما عوول أنه يبدى الفتوحات والغزوات ديالو في جعل "الدارجة" لغة التعليم والتعلم، وربما غدا أو بعد غد، اللغة الرسمية دستوريا للبلاد…
غادين تكًولو ليا: "هاذاك شغلو ومن حقو"…"ديزولي" بالنسبة لخوكوم، ماشي من حقو، هاذا من حق الدولة للي ملزمة باش تكًولها لينا صراحة، وتوضع لينا المؤسسات ديال بالصصح باش نقومو بالنهوض بهاذ اللغة المغربية للي عزيزة على كل مغربي ديال بالصصح…ماشي "تسسوتريتي" (أعمال المناولة ياك؟) هاذ العملية لواحد القمقوم للي كايكذب وهو كايحنزز فيك، ماشي لأنه "عارف"، لا…لأنه ماشي بحال الناس، لأنه زايد عليهوم بالصصحبة ديال ملك دالبلاد !!
هاذ الشي شججعو لدرجة أنه دار من راسو الشخص الوحيد للي يمكن ليه "يمأسس" الدارجة، ويرججعها "لغة رسمية" بغا للي بغا، وكره للي كره…لأنه مللي كاتوصل لدرجة تدير "ديكسيونير" للغة ما، كيف ماكانت، معناه أنك رججعتيها "رسمية"، والقموس للي وضعتيه ليها، صبح المرجع "الإجباري" للحديث بها وللكتابة بها…
من هاذ المنطلق، كانكًول لهاذ المخلوق، أنني غير ملزم بالديكسيونير ديالك، لأنه قاموس لا يلزم أحدا غيرك نتا واصحابك…ومن هاذ المنطق كانوججه نداء للدولة، باش تقوم هي بنفسها بتأسيس "أكاديمية للغة المغربية العامية" للي تكون المؤسسة الوحيدة للي عندها الحق في البحث في التراث اللغوي ديال المغاربة انطلاقا من ظهائر السلاطين المغاربة ديال هاذي 12 قرن، ومن المراسلات "القيادية" ديال زمان"، ومن تراث الملحون، وتراث العيطات المتنوعة ديال البلاد من "الحصبي"، حتى للمرساوي، مرورا من "الحوزي" و"عبيدات الرمى"، وكولها الأشياء للي داخلة في "ضمير وذهنية" أمة بأكملها، ماشي انطلاقا من قفشات نور الدين عيوش للي داير لينا اللعيبة ديال "هبل تربح"…
باش نللخص، يا إما الدولة تتحممل مسؤولياتها، يا إما هاذ خيينا ديال عيوش يززم دركًومو ويخللينا عليه في التيقار…واش المثقفين تسنناوك آ المعللم باش يكتبو باللغة المغربية الدارجة ؟؟؟ ياك نتا كاتكًول لعباد الله مفرنس وقاري الفرانساوية؟ واش فرنسا دارت بحالك باش ترججع الفرانساوية لغة رسمية في بلاصة اللاتينية من قبل "فرانسوا رابلي"؟؟ طبعا لا…وعليه راجع واحد الشويا تاريخ فرنسا، وسير تكممش عافا خويا، وخللي الدولة تدير خدمتها، وخللينا نتخابطو معاها حتى يجيب الله التيسير…راه الدولة غير موظظفاك في حوايج هيا مامستاعدداش تواجهها، وحينت عارفاك شويا هبيل، خددامة بيك على الججهد..إيلى قوودتيها، غادي تنكرك آ الزغبي..