شكون امر لشكر باش ما يستورزش. خرج عينيه وبغى العدل كاع وجا البارح كيقول ما بقيت باش نترشح وعندنا 4 وزارات والنساء المرشحات ما عندهم علاقة بالحزب

ادريس لشكر اللي خرج على الاتحاد الاشتراكي ورجعو مبهدل ودخل للحكومة واخا ما حاملو حد حقاش عندو اللي يدافع عليه فدار العرس٬ دابا عاود دخل عينيه. فالبارح فاجتماع حزبي بالرباط اكد لشكر انه ما غاديش يستوزر وشكر ناسو اللي دافعو عليه. ظاهريا ما بغاش يستوزر ولكن اللي كيعرف لشكر غادي يعرف ان اللي دافع عليه باش يدخل للحكومة هو اللي كال ليه رجع للاور.
لشكر احد اكثر السياسيين اللي ما كيحملوهمش لمغاربة وغير طلو على مواقع التواصل الاجتماعي غادين توقفو على هاد الشي٬ جا البارح كيقول لاتحاديين ولاو غير مضاربين على الحقائب الوزارية٬ وقال ليهم راه عندنا 4 حقائب وزارية. الشغل = ما صالحة لوالو= والمساواة =يمكن وزارة منتدبة= بالاضافة الى كتابتين للدولة وحدة فالاعلام والاخرى فشي قطاع اخر.
حسب مصدر اتحادي ل"كود" فان هاد الشي يتنافس عليه بنمسعود وحسناء ابو زيد وعبد الحميد لجماهري ويونس مجاهد وبنعتيق وشي وحدة اخرى بالاضافة الى اتحادي اخر. حسب قيادي اتحادي فان النساء المرشحات ماشي اتحاديات "يالله وصلو للحزب ولكن كاين اللي كيدافع عليهم بزاف بزاف بزاف وغادين يدخلو. الاتحاد اللي قبل الذل يستعد يزيد يقلبو". المصيبة فترشيحات النساء ان اللي تستحق الاستوزار وفيها معيار الكفاءة هي بنت ادريس لشكر اللي هي اتحادية. كان هي اللي تاخد الوزارة ماشي يتزاحم فالاول ويرجع اللاور بعد ذلك