الكاريكاتيريست خالد كدار يروي ل"كود" تفاصيل ما حدث له في ليلة كفكاوية بالكوميسارية ويؤكد "ما عرفتش علاش شدوني وأتمسك بحقي في متابعة البوليس"

شهادة خالد كدار ل"كود" حصريا
عرض علي صديقي نور الدين طريف (عضو في الكوركاس) ليلة الجمعة 25 ماي 2012 نمشي نشوف بنتو بالقنيطرة، مشيت معاه. من بعد دخلنا بجوج لفندق سفير لقديم. كانوا أصدقاء كلسنا معاهم. مع الجوجت الليل (صباح السبت 26 ماي 2012) تقريبا خرجنا. واحد الفيدور حبس نور الدين وطلب منو يدور معاه. صديقي رفض وكال ليه علاش غادي ندور معاك.
بدا الفيدور كيعاير ويسب، وفديك اللحظة وقفات طونوبيلة ديال البوليس، الفيدور بقى كيعاير وأنا نمشي عند البوليس كلت ليهم حشومة عليكم السيد كيعاير فالسيد قدامكم.
أنا جاتني هاد القضية فشي شكل. البوليس ما دخلش، كال لي طلع معانا. كلت ليهم مرحبا ما كاين مشكل. جا صاحبي اللي ما شافنيش باش طلعت وكال لي علاش طلعوك.
كلت ليه البوليس طلبوا مني نطلع طلعت. وصلنا تقريبا فحدود الجوج ولا الجوج وربع للكوميسارية.
عيطت على البوليسي الأول وسولتو: "علاش جبتوني"؟. ما جاوبنيش خلاني ومشى.
جا البوليسي الثاني، عاود ليه نفس السؤال وما داهاش في.
تلقت وكلت ليهم "كيفاش تجيبوني وتحطوني فكوميسارية وتزيدو فحالكم. واش ولات السيبة فهاد لبلاد". حتى واحد ما رد. بقينا فالكوميسارية حتى الخمسة الصباح. فهاد الساعة بان لي الفيدور والجيرون (المسير) داخلين. مشاو عند صديقي مور الدين. فهمت باللي هاد القصة اللي كالوها لينا كلها غير تمثيل، شدونا باش يجيبوا مول الشي ولا الجيرون. القضية فيها ابتزاز ماشي شي حاجة أخرى واستعملونا حنا.
جاوا عند صاحبي وطلبوا السماحة، كلت ليه أنا ما عندي مشكل غير باغي نعرف علاش جابوني وصافي. الجيرون بغى يرشي صاحبي وكا ليه إيلى بغيتي ندوروا معاك مرحبا غير فكنا مع البوليس.
نور الدين صاحبي كعى. تشبكات القضية وطلبت منا البوليس نمشيو فحالنا. كلت ليهم قابلين غير كولوا لينا علاش جبتونا وآش درنا.
كلت ليهم راني ما تناكرت مع حد ما ضاربت مع حد، وكلت للكوميسير ما خارجش حتى نعرف علاش جبتونا. بدا الكوميسير كيغوت علي، وجبد البورطابل وبغى يصورني، ما خليتوش وقست البورطابل ديالو وهو يطيح. كال لصحابو شهدو عليه راه بغى يضربني. طبعا كيكذب وصحابو راهم شاهدين كلهم. كلت للمسؤول عليه ما عندوش الحق يصورني، إلا إيلى كان محضر وعارف التهم اللي موجهة لي.
البوليسي سمع هاد الهدرة جمع تلفونو وغبر.
حسيت بيهم تزيرو معاي، وهما يكولو لي غاديين نهبطوك للتحت. كلت ليهم ماشي مشكل فين ما بغيتو تهبطوني هبطوني.
عيط البوليسي على نور الدين دار ليه محضر ووقع بعد ما كتب "بتحفظ". سولوه علاش دارها، شرح ليهم كلشي. كال ليهم كنتحفظ على بعض المصطلحات.
هاد التصرف البسيط خلى البوليس ينفعل. بدا لغوات وهبطونا تقريبا مع الثمنية دالصباح.

هبطنا للتحت وكالو لينا غادين نقدموكم لوكيل الملك، كلنا ليهم ما شي مهم غير كولو لينا علاش.
قبل ما نمشيوا بدا البوليس كيحرر فالمحاضر، جا عندي وعيط علي وطلب مني نعاود ليه آش طرا. عمر المحضر وما دارش التهم.
وقعت على اللي كلت ليهم وشفتو، كالو لي غادين نقدموك بتهمة السكر العلني، كلت ليهم راني ما كنتش سكران.
مشينا عند نائب وكيل الملك واستمع لينا. كلت ليه باغي نرفع شكاية ضد البوليسي اللي بغى يصورني وكنتمسك نعرف علاش اعتقالوني. وهو يفاجأني بتهم منها "التهم السكر العلني وإهانة البوليس وعرقلة سير المداومة والسب والقذف". كلت ليه راه ما فراسيش هاد الشي حتى سمعتها من عندك.
نائب وكيل الملك تعامل معاي بلطف وطلب مني نعاود ليه آش طرا، كلت ليه كلشي. تفاجأت باش خلانا فالحراسة النظرية وطلب مني ندير تحليل الدم باش يتأكد واش كنت سكران ولا اللا.
قانون جديد جابو السي الرميد (وزير العدل والحريات) كيخلي محكومين بحال الفراع وولد شباط وكيدير تحليل الدم لبحالي.
كلت ليهم راني ما كنتش سكران وما غاديش ندير تحليل الدم.
رجعونا للكوميسارية لتعميق البحث. وصيفطوني لكوميسارية أخرى باش ندير تحليل الدم. كلت للبوليسي ما دايرش تحليل الدم كالو لي كولها للطبيب حنا خاصنا نديوك للطبيب. مشيت عند الطبيب وكلتها ليه ووقعت على ورقة ورجعوني لكوميسارية أخرى، وحرروا لي محضر من جديد وكتبو في المحضر بأنني قبل ما نجي للقنيطرة تناولت الخمر في الرباط. رفضت ليهم هاد المحضر حقاش ماشي بصح. ورفضت نوقعو وبقاو معاي حتى لحداش ونصف الليل (ليلة السبت)، فالصباح رجعوني عند وكيل الملك وجا المحامي ديالي وكال لي غاديين يتابعوني فحالة سراح.
ما كنظنش فاللول عرفوني شكون أنا ولكن من بعد تحركوا التلفونات وحصلوا باش تمسكت بمتابعة البوليس.
هادي ماشي أول مرة غادي نتحاكم فيها، كنعرف المحاكمات وكنعرف سير العدالة غير ما يجيش عندي السي الرميد ويكول لي تنزيل الدستور. حشومة يشدو وحدين ويكولو ليهم سكرانين والمحلات اللي كتبيع الشراب معروفة ومفتوحة.