ابن عرفة العدالة والتنمية كيكذب ويضحك عليكم: كاليك "تعزيز مسلسل المصالحة مع السياسة مشروط بجعل الناخب يرى أثر صوته في البرنامج الحكومي" وانت شكون عرفك شكون صوت عليك وشكون دار ليك الحكومة بعدا

ابن عرفة العدالة والتنمية من حدو كيهدر وهو كيزيد يتفرش. ضعيف بلا شخصية انتهازي سياسيا وكيقول الكلام ونقيضو بلا ما يحشم. اخر فتوحاته رده اليوم خلال جلسة التصويت على البرنامج الحكومي٬ انه بلا ما يعرگ قال ان "الحكومة تستند إلى رؤية سياسية واضحة، باعتبارها حكومة إصلاحات ومواصلة لها ولأوراشها، وليست حكومة تراجعات عن أي منها". واضاف ان حكومته "تكتسب هويتها السياسية من انخراطها في تجسيد مقومات النموذج المغربي وتعميقها، على أساس الثوابت الجامعة للأمة، تحت قيادة جلالة الملك محمد السادس" وباش عور ليها العين مزيان مزيان زاد "سمات الطابع السياسي للحكومة حرصها في البرنامج الحكومي على الانطلاق من البرامج الانتخابية لمكونات الأغلبية الحكومية" واعتبر ان "مسار ربط المغاربة بالشأن السياسي واستئناف وتعزيز مسلسل المصالحة مع السياسة مشروط بجعل الناخب يرى أثر صوته في البرنامج الحكومي والقرارات العمومية".
صحيح ان الشعب عطا الاغلبية لحزبك ولكن ماشي ليك. عطاها حقاش الحملة دارها بنكيران ماشي انت. حتى المحمدية اللي ترشحتي فيها صوتو عليك الناس على هاد القبال. يعني كليتيها بادرة ما هزيتي ما حطيتي.
ثم على اش من انسجام حكومي كتكلم. على من كتفلى يا ابن عرفة؟ وقبل هاد الشي غير كول لينا غير بيناتنا. شكون صايب ليك الحكومة وشكون قاد ليك كلشي. انت؟ مستحيل وانت عارف هاد الشي. كيفاش واحد مهزوز بحالك ناض كيقول راه معايا الرميد باش نغلب اخنوش يقدر يهدر على هاد لكلام لكبير. ودابا غير كول لينا شكون كتبو ليك واش الرميد؟ الخلفي الناطق باسم الحكومة ما فيدوش، بين الانتهازية السياسية ديالو باش باع ولي نعمتو وشارك معاك فالاغتيال السياسي للامين العام بحالو بحال عدد من قادة هاد الحزب.
بحالك وغادي نشوفها بعينيك٬ كيخرجو على السياسة كيرجعوها باردة. كاليك تعزيز مسلسل المصالحة مع السياسة. انت غادي تدخل للتاريخ ولكن فخانة من رجع السياسة ميوعة تنفيذ لاوامر. عندك فريق حكومي ما حاكمش فيه. عندك وزرا ما غادينش يحتارموك حقاش ما فيدكش.
كيفاش بوجهك حمر كتكلم على البرامج الانتخابية على امور انت اول واحد عارف انها ما كايناش. شوف ابن عرفة٬ احسن ما يمكن ليك ديرو هو تسكت. فين ما هدرتي كتزيد تكره الناس فيك فحزبك فالسياسة فالانتخابات.