الباحث اگنوش: حراك الريف عادي جدا راه المصيبة الكبييرة للدولة وللمخزن، هي الناس تسكت وماتخرجش للشوارع

الكلام المراجل على حراك الريف من وجهة نظري… ماعممر دوار السكويلة خرج احتج على شي حاجة، ياك؟! ولكن آش وقع في 16 ماي 2003؟!
خوكوم ماكايدويش على حراك الريف لسبب واحد…هو أنه كايعتابرو عادي جدا…وكايعتابرو صحي جدا…وما كايخلع غير الخرازا للي مافاهمين حتى وزة في تاريخ المجتمعات وفي تاريخ المغرب…
للي محييحين على حراك الريف هوما ثلاثة ديال الأصناف…
1- الصنف اللول فرحان وكايتسنى إيمتى الدولة –للي كايسمميها المخزن- تطيح للأرض، وتتحك ليها زنفارتها معا التراب، وتتسخسخ، وماتبقاش في الوجود…طاري ليه بحال إيلى مخاري معا جارو في الدرب !!
2- الصنف الثاني حمار اكثار من اللول، وبارك كايدافع على الدولة وعلى المخزن، وكايكًول بللي الناس ديال الريف ولاد الحرام، وباغين الانفصال، ومدووخينهوم شي مساميم كاينين في هولندا وفي بلجيكا، ويمكن كاينة حتى الجزائر كًاع !!
3- هاذوك الظرييفين كًاع، كايقولو ليك: هاذو "راهوم باغين الحكم الذاتي" !!… أومن بعد كًاع يا البهيمة؟؟ إيلى كان الحكم الذاتي مسللكهوم وعندهوم الموارد الكافية باش يعيشو في شبه استقلال عن المركز، وطالبو بيه في إطار المؤسسات القائمة وفي إطار السلم والديمقراطية والإدلاء بالأصوات في الصنادق، فاين هو المشكل وعلاش لا؟؟؟ علاه دولتنا ما اقتارحاتش على البوليزاريو الاستقلال الذاتي في إطار الجهوية الموسعة؟؟ !!
هاذ الأصناف بثلاثة غابت عليهوم قضية وحدة ماشافوهاش…كون ماكانش الاحتجاج على المطالب المشروعة والمعقولة، كون المخزن خلق دينمها ودفع بيها بأي طريقة من الطرق باش تخرج للعلن ! هههههه
علاش؟
لأنه مايمكنش ليه يضمن استمرارية الدولة إيلى ماعرفش بالتدقيق مطالب المجتمع، وإيلى ماخرجوش الناس للشارع العام يطالبو بهاذ المطالب…
المصيبة الكبييرة بالنسبة للدولة وللمخزن، هي أن الناس تسكت، وتضرب الطم، وماتخرجش للشوارع…لأنك ماغاديش تعرف الناس علاش مطويية !! إيلى عرفتيها علاش مطوية، غادي تكون عندك إمكانية الحوار، وإمكانية الاستجابة، وإمكانية تدبير "الأزمة" إيلى كانت ننيت أزمة…بالطبع مادام أن الاحتجاجات سلمية، وإيلى، لا قدر الله، ناضت شي تخرميزة من عند شي بعضين، راه القانون فوق الجميع، لأن القوات العمومية الشرعية راها غير كاتاكل وناعسة كاتستاراح !!