قالك الكلاخ فيه وفيه وكاين شي وحدين غير كيسمعو وتابعين جلالة بالنافخ. واحد السيد اطلع بشريط فيديو على شي موقع محلي بفاس وبدا يسب نبيلة منيب الأمينة العامة للحزب الاشتراكي الموحد بسبب تصريحات ديالها فقضية "حراك الرّيف".. السيد معارف والو غير كيحل فمُّو وتابع جلالة بالنافخ. وحسب مصادر "كود"، فإن الأمر يتعلق بشخص يدعي أنه "فاعل جمعوي" وعزيز عليه يبان فأي حاجة كانت وكيبغي يشري حنكو مع سيادو ف السلطة والأمن لقضاء مصالحه الخاصّة.. ودبا ناض استغل قضية الرّيف عاود باش يقول أنا وطني ومغربي وعاش الملك.. ومعارفش أن راه كولشي مغربي ووطني وغير كيركع مع راسو باش يبين راسو زعما انا معاكوم غير عاونوني.. وراه اللّي خاصو يعرف هاد والناس اللي بحال راه الرّيف مع الملك وضد الفساد اللي كاين داخل الدولة والناس خرجات على مطالب اجتماعية ماشي ضد الملك. وأكثر من ذلك، هاد السيّد ناض يحل فمُّو على نيبلة منيب اللّي السيرة الذاتية ديالها عامرة ودماغها عامر بزّاف ناض كيسبها ومعارف عليها والو وحتى الإسم ديالها معافروش وسمّاها "أمينة منيب" باش تعرفو بنادم مسكين غير غادي ومعارف فين زاطم. ونوض سير شوف ليك شي خدمة او حاجة تلهي فيها راسك او سير تبيع بطاطا او سير قرا شويا باش تعرف شكون هي نبيلة منيب اللّي تهمتيها بما أسميته "قاعدية وتدعم الفكر الأصولي القاعدي المتطرف".