بسيمة هدرات يا ناس: اتابع واعبر عن اسفي واشيد. كيف لقاصر يمارس العنف وهو في غاية السرور. بلا حشمة قالت ليك الاغتصاب ديال الطوبيس غريب على مجتمعنا. اوه واش وقع فالمريخ

بعد ما ضرباتها بسكتة وما هدرت ما قالت والو وحتى ناضو ليها وبدا السبان فيها عاد خرجات الوزيرة لالة بسيمة الحقاوي وزيرة الاسرة والتضامن وحوايج خراين. خروجها كان فتدوينة علي صفحتها. واخا هادي تخربيقة فالتواصل. قضية بحال هادي ديال اغتصاب شابة ومريضة من قبل شباب فالطوبيس وتصوير هاد الشي٬ تستحق طرق اخرى فالتواصل ماشي تدوينة.
الوزيرة قالا انها تتابع "مند الصباح الباكر ليوم امس تبعات جريمة مؤسفة ومشينة تم اقترافها وتصويرها داخل حافلة للنقل الحضري، والتي ارتكبها قاصرون في حق فتاة". هي نشرات هاد التدوينة غير البارح فالليل. اي انها بدات كتابع الموضوع حتى الاثنين فالصباح والفيديو ولخبارات عليه تنشرات ليلة الاحد. شوفو شحال تعطلات بعدا.
الوزيرة قالت باللي الجريمة "تسائلنا جميعا، كل من موقعه ومسؤوليته، مسؤولين ومنتخبين وفعاليات مدنية وإعلاميين ومؤثرين في المجتمع" و"تدعونا لتقديم الأجوبة العملية بكل مسؤولية وموضوعية عن سؤال كبير، وهو : " كيف يمكن لقاصر أن يمارس العنف وهو في غاية السرور ؛ كيف لقاصر أن يرتكب جريمة منتشيا كم يلاعب شيئا ؟!"
وعبرت عن أسفها وانشغالها "بهذه الجريمة الشنعاء الغريبة عن مجتمعنا، فإنني أشيد بسلطات الأمن التي توصلت لمرتكبي الجريمة في وقت قياسي". وزيرة وما كتقولش الواقع. شكون اللي قال ليك الاغتصاب غريب عن مجتمعنا يا لالة الوزيرة. هادوك الاحصائيات اللي عندك ايلى كانو على الاغتصاب راهم خاطئين. يوميا يقع التحرش ومحاولات الاغتصاب فالطوبيسات فالفضاء العام لمغربيات وما عمرهم خبرو حد. هاد الجريمة وقعات وماشي غريبة على مجتمعنا
بسيمة اضافت انها عازمة على "مواصلة الجهود من أجل تنزيل السياسات العمومية سواء المتعلقة بحماية الأطفال، أو بالنهوض بحقوق الأشخاص في وضعية إعاقة أو المتعلقة بالتمكين للمرأة" وانها ستواصل "العمل من داخل المؤسسات من أجل التسريع بخروج قانون محاربة العنف ضد النساء الذي صادق عليه مجلس النواب وينتظر المصادقة عليه قريبا في مجلس المستشارين".