غادين للهاوية سيگورو. 17 ناكو حمارة و4 اغتصابو بنت فالطوبيس وشي نحر فلنديين كتجمعهم الجنسية المغربية وبراهش فسنهم: كنوجدو الخلف لداعش وغيرها والتطبيع مع العنف بداية النهاية

اش كيجمع هادوك اللي تناوبو علي حمارة فسيدي قاسم وكانو 17 ونقلوهم للصبيطار بعدما عرفو باللي حمارة جاهلة وبين اللي نحر بموس ففيلندا وكان طالب اللجوء السياسي وبين 4 اللي اغتاصبو بنت فالطوبيس =كازا ولا القنيطرة= وصورو فعلتهم. اللي كيجمعهم المغرب كلهم عندهم الجنسية المغربية زايدون براهش كلهم صغار. بحالهم بحال اللي دارو العمليات الارهابية فبرشلونة. الفرق بيناتهم هو ان هاد البراهش ديال كاتالونيا عاشو تماك فاسبانيا.
هاد الشي اللي وقع فوقت قصير كيبين ان المغرب غادي للهاوية. الاسرة فاشلة فتربيتها. الدولة فاشلة فتعليمها وتربيتها فاشلة فحماية الامن الجماعي. الاحزاب والجمعيات فاشلة فتاطيرها. اذن فشل جماعي لينا كلشي. خطورة هاد الشي خاصة الاغتصاب الجماعي والنحر في فنلندا ان هناك جيل واجد ياخدو اللي بغى. عقول يقدر كل متطرف يخرج منها للي بغى. ايلى شدك شي امام بحال ديال برشلونة ودخل ليك شي تفاهات ساهل يديرو اخطر مما حدث في "لارامبرا". ساهل يمشيو لليبيا ولا لسوريا ولا لاي قريحة كحلة.
هاد الشباب اللي باينين اطفال طبعو مع العنف طبعو مع القتل طبعو مع الموس والسيف. شي بلايص ولاو كيتباهاو بيه. كيكريسيو الناس فكل المناطق مرفحة متوسطة ولا فقيرة. كيكريسيو طوبيسات كيكريسيو بياعة وشراية. العنف غادي وكياخذ بعد جديد. هادي عامين كانوا لمشرملين. كيتباهاو بسيوفهم وبفلوسهم. سالات ديك المرحلة دابا ولا التباهي بالاغتصاب. ماشي غير التباهي بل التطبيع معه. الاطفال البراهش كيضحكو وكانهم دايرين حدث عادي عرضي. دارو فضيحة وجريمة خطيرة وما مسوقينش كاع ليها.
شكون المسؤول على اللي وصلنا لهاد الشي. كلشي. كلشي. من رب وربة الاسرة الصغيرة وطلع رئيس الدولة ودوز على المدرسة والشارع والحي والمدينة والسياسي والحزبي والنقابي والجمعوي والوزير…… اذن الحل خاصو يكون جماعي. المغرب اليوم عنوان كبير فالصحافة العالمية مقتارن بالارهاب. كتبو اسم المغرب فكوكل وغادين تعرفو بانفسكم.
باشي باش نخلعكم ولكن هاد الشي اللي قالوه باحثين اللي خدمو على الحرب الاولى والافلام اللي دارت على هاد المرحلة بحال "لوروبان بلان" ديال المبدع النمساوي ميكاييل هانيكي. بدات بتربية الاطفال والشباب على العنف. العنف فالحي فالمدينة. عطى جيل جاب هيتلر ودار الحرب العالمية الثانية. هاد الشي نظرات ليه داعش فكتابها "ادارة التوحش" بقدر ما ترعب المدينة والسكان تتمكن بهذا العنف الخايب والارهاب الخطير بعد فترة من الاستفراد بالحكم لان الجميع باغي غير الهنا ويصبر على كلشي.
راه المغرب محتاج يدخل يدير نقاش حر عمومي. هاد الشي ناقصنا فكلشي ولكن باش يكون تهديد للسلم الاجتماعي خاصو يولي اولية انية