غادي اغيبو ثلاث ديال اللاعبين على الوداد في الماتش ديالهم المهم ضد فريق الفتح الرباطي، في أول دورة من الدوري الاحترافي لكرة القدم، وهو الماتش لي غادي العبوه اليوم بمركب محمد الخامس بالدار البيضاء، مع السبعة ديال لعشية. الوداد غادي اغيب عليه كل من وليد الكرتي، اللاعب المهم في صفوف الفريق، والسبب أنه توعت وميقدرش العب الماتش لأن الطيبي كان عطاه 10 أيام ديال الراحة عاد ارجع للتداريب. ومغاديش اكون في الماتش حمد أولاد لأنه مدربش مع الفرقة هاد الأسبوع مشى لبلجيكا باش اشوف ولدو مريض ومحضرش المعسكر ديال الجديدة، داكشي علاش مواجدش باش العب الماتش وثالث لاعب مغاديش العب هو شيكيتارا لمبقاش باغيه عموتة وكيقلب على حل باش اتفك منو، بعد ما عرف أنه لاعب ضعيف وميقدرش ادير الدور لكان كيلعبو فابريس وجيبور في خط الهجوم وغادي اضطر عموتة باش اعتمد على بنشرقي في خط الهجوم في غياب مهاجم آخر اقدر اعوض الغياب ديال فابريس، وجيبور، خصوصا أن بنشرقي لعب ماتشات في العصبة في الهجوم وكان مزيان وسجل أهداف. الوداد خاصو اربح اليوم باش ارفع من المعنويات ديال لاعبيه قبل المباراة القوية أمام فريق صن داونز الجنوب الإفريقي برسم ربع نهائي دوري عصبة الأبطال الإفريقي.
