شباط قهر الاستقلاليين. مؤتمر: وتنازل وهنينا وهو ل"كود": معلوم غادي ننجح وسول بنفسك

حميد شباط الامين العام لحزب الاستقلال شاغل الاستقلاليين وقاهر عدد منهم. شي كيبغيه وشي كيكرهو. حتى اشد خصومو اليوم كيشهدو ليه بايجابيات كثيرة. كيحييو فيه جرأتو. احد مؤتمريه قال ل"كود" اليوم السبت فالمركب الرياضي مولاي عبد الله حيث المؤتمر 17 "هاد الشي اللي دار شباط كولو خلى صورة ايجابية عندنا. كاين تعاطف معاه"٬ استقلالي اخر ابدى في دردشة مع "كود" اعجابه بشباط "كيفاش هاد السيد باقي واقف كيقاوم. رغم كلشي اللي دارو ليه مازال واقف مازال مضارب وهو عارف الخصم ديالو مزيان ومع ذلك ما تنازلش. هاد الشي ما يمكنش لشي استقلالي واخا يكون خصمو ما يفتاخرش بيه".
حميد شباط كان فالخيمة المخصصة للشخصيات الاستقلالية المهمة واللي جابها "لمنور" احد اشهر الاخصائيين فالخيايم فالصحرا باش تكون فمقام هاد القيادة الاستقلالية٬ كان محاطا بابنيه. فين ما مشى كيمشيو معاه. شي كيتجنبو وما يسلمش عليه وشي كيعنقو ويبوسو. باش سولاتو "كود" على حظوظو فالامانة العامة اللي كيتنافس فيها مع نزار بركة رد "معلوم غادي ننجح. فينما درت كينشوف الناس معايا. يمكن ليك تسول بنفسك". شباط كان يتلقى التهنئة من بعض المؤتمرين.
لما عاد للخيمة خرج رفقة خصمه الظاهري نزار البركة كان بالقرب منهما ولد امحمد بوستة. دخلو للقاعة بجوج حيث تم التصويت على لجنة القوانين. دخلو دايرين يديهم فيد بعض. صورة عجبات كثير من الاستقلاليين.
بعضهم من اللي باغي شباط يمشي فحالو كيف واحد المؤتمر قال باش داز حداه "وتنازل خلاص وهنينا". هاد العبارة كيتخلص الحالة اللي كاينة فالحزب ساعات قبل بدء التصويت الالكتروني على الامين العام. شباط متفاءل ونزار كيف ديما ما كيديكاجي حتى شعور.
التشويق مازال كاين. التوافق شوية صعيب لان استقلالي اوضح ل"كود" "هاد الشي ديال اليد فاليد غير صواب وصافي. اللي كيبعدهم بزاف وموحالش يتفاهمو". ونكملو نشوفو الفيلم كيفاش غادي يسالي