عبثية تشكيل الحكومة. بنكيران لاعب على الوقت والوحي واخنوش لاعب على بنكيران يهديه الله ويبعد من شباط والاستقلال باغيين انتخابات جديدة وما معولينش يهزو الراية البيضا

دابا اكثر من 50 يوم على تكليف عبد الاله بنكيران لتشكيل الحكومة من قبل الملك بعد فوز حزبه العدالة والتنمية بانتخابات سابع اكتوبر التشريعية. وقت طويل ضاع وموحالش غادية تبان هاد الحكومة ايلى بانت مع بنكيران٬ الا ف2017. دابا عبد الاله بنكيران يعول كثيرا على عامل الزمن. الوقت بالنسبة ليه يرطب كلشي. تجربته في اول لقاء مع عزيز اخنوش رئيس التجمع الوطني للاحرار يوم 28 اكتوبر علماتو باللي ممكن هاد الزمن يغير المواقف غير بالشوية. حقاش الفرق بين اللقاء الاول والاخير اللي دار قبل زيارة الملك لنيجيريا٬ كبير. حاس باللي ممكن يدخل التجمع الوطني للاحرار يدخل للحكومة ويتخلى على الشرط الاساسي اللي هو "ما داخلش مع الاستقلال فحكومة وحدة".
بنكيران يعول على امر ثان. يعرف ان التجمع الوطني للاحرار ماشي سيد قراراته. عندو تجربة تاني مع صلاح الدين مزوار الرئيس السابق اللي تساب مع بنكيران او كالو ليه سبو ونهار خرج الاستقلال من الحكومة عيطو ليه ودخل. اي ان بنكيران يعول على "وحي" يجي للحزب يكول ليه يدخل. لذا ووفق مصادر من حزب العدالة والتنمية ل"كود" فان الانفراج اللي كيتسناه بنكيران ايلى وقع راه غادي يجي من نفس الجهة اللي كالت لمزوار يدخل.
حسابات بنكيران غير حسابات عزيز اخنوش. هذا الاخير يعول على اقتناع بنكيران بوجاهة موقفه. الاستقلال مع شباط ما كاينة ثقة فيه، ما يمكنش تشكل معاه حكومة منسجمة قوية. الصداع غادي يكثر والتشويش غادي يكثر. انضاف الي هذا ان الاستقلال خرجو للعار مع اخنوش. هاد الشي يخلي يستحيل يكون الاحرار فشي حكومة فيها الاستقلال. كاين صوت استقلالي كان مع فكرة دعم الحكومة دون المشاركة فيها. يمكن هذا هو الشرط الوحيد اللي يقبل بيه اخنوش يدخل للحكومة.
هاذ الصوت ماشي صوت جميع الاستقلاليين. هادو كيشعرو باللي جهة فالدولة ولات ضدهم. شباط كيحس باللي تم استعمالو وباش فات وقتو بغاو يرميوه. غير هو فطن ليها قبل ما يلوحوه اعلن على التحالف غير المشروط مع بنكيران. عطاه شيك على بياض. كلفة هاد الشيك كبيرة حقاش الجهة اللي بغات تصفيها لشباط سياسيا طبعا كان عندها حساب اخر.
دابا الاستقلال مع تعاود الانتخابات كاع. باغي يرهق اللي عينهم فحزب الاستقلال او فيه هو بشخص خاص.
وسط هاد الحسابات لمغاربة غاديين يتسناو اكثر. ما كايناش حكومة فالافق. الملك باش يرجع يمكن الامور تتغير واخا موحالش يدخل بعد خطاب المسيرة الخضراء من داكار.