يوميات ابيدجان. الطبالة والغياطة لاستقبال الاسود والايفواريون متاكدين باللي ماتش مربوح

استقبال كبير للطبالة والغياطة للمنتخب المغربي لكرة القدم البارح الاربعاء مللي وصل لمطار هوفويت بوانيي بالعاصمة الايفوارية ابيدجان. دارو ليه استقبال كبير هزو رايات المغرب واللعابة بانت فيهم الفرحة بهاد الاستقبال. اللي بغى يتصور تصور واللي بغى يدير سيلفي دارها. طبعا اللعابة دارو حتى هما صور للذكرى للوصول بتلفوناتهم. مباشرة اللعابة مشاو للوطيل سوفيتيل بالعاصمة الايفوارية. تماك كاينة الاقامة ديالهم. اليوم الخميس غاديين يديرو اول حصة تدريبية مع الربعة و45 دقيقة بعد الظهر
اللعابة باينة فيهم الثقة والرغبة يديرو ماتش مزيان ياهل المنتخب الى مونديال روسيا. هاد الثقة كاينة عند الايفواريين وبزاف
فالشارع الايفواري عندو موقف اخر من كيف ما سولاتهم "كود" كلشي كيعاود نفس الجملة وبثقة كبيرة "رابحين الماتش". ماتش السبت عن اخر جولة من اقصائيات المتأهلة لكأس العالم روسيا 2018 محسوم عند تراوري اللي خدام فالقوات العمومية الايفوارية بالمطار "حنا غاديين نربحو. هادي باينة" يقول المواطن الايفواري ل"كود".
مواطن اخر التقته "كود" البارح كان اكثر حسما "تاهلنا 4 المرات متابعة وطبعا الخامسة فالجيب". فطريقة كلامهم وعند طرح السؤال عن نتيجة الماتش كلهم حاسمين. الرباح ديالنا. عندنا لعابة كبار احسن من المغرب وعندنا الجمهور وكاين تشجيعات من الحكومة للعابة. كلشي الظروف مواتية ليهم باش يمشيو للكوت ديفوار.
الماتش صعيب والاجواء ماشي ساهلة لكن اللعابة لمغاربة محتارفين وعندهم الامكانيات اللي تخليهم يديرو ماتش واعر. تخليهم يحققو حلم لمغاربة بالتاهل الى مونديال 2018