غير داوي

شادين كونجي

تعاني الجامعة الملكية المغربية لكرة القدم من التلفة هذه الأيام، باغا مدرب وما عارفاش آش من جهة تشد، ولا أحد يعرف ما إذا كان المسؤولون قد حللوا بحكمة أسباب الإخفاق وعرفوا ما الذي ينقص المنتخب تحديدا أو أدركوا أخيرا ما الذي يحتاج إليه بالضبط، فهل ارتكز المسؤولون على إستنتاجات منطقية توصلوا إليها بعد تحليل عميق لأزمة المنتخب وبان ليهم ما خاصنا غير مدرب؟
- صافي بقى لينا غير المدرب؟ وهادي هي آش خاصك آ العريان؟
- ما تزربش، حتى إيلا كان منتخبنا عريان ملط، راه يقدر المدرب يكون سروال ماشي خاتم.
وما قدوكش ربعة السروال اللي لبسناهم للمنتخب وبانت العورة ديالو؟
- هادوك الربعة كانوا سراول البلاد، دابا كنهضرو على سروال براني.
في كل مرة يردد فيها مسؤولو الجامعة أنهم يبحثون عن مدرب بمواصفات عالمية يبدو للجميع، كما لو أن الأمر فقط يتعلق بتصحيح خطأ ارتكبوه، وليتخلصوا من عقدة الذنب التي يشعرون بها بعدما عينوا سابقا مدربا مغمورا لقيادة منتخب مشهور، وهناك من يرى أن الوقت غير مناسب لتعيين مدرب على رأس منتخب سيكون في راحة لمدة ستة أشهر، يعني بحالا جبنا باطرون جديد يبدا الخدمة في شركة كلشي خارج فيها كونجي من غير العساس·
- ناري على مكلخ، واش كتصحب الناخب الوطني غير كيجمع اللعابة في لونطريما ويسخن فيهم لشي ماتش؟
- ومالو آش كيدير؟
- المدرب خاصاه مدة كافية يبقى غير بوحدو يفكر ويحلل باش يفهم اللاعب المغربي مزيان ويدير معاه علاقة·
- ست شهور باش يدير فيها علاقة أو لا يجمع لينا فيها اللعاقة؟
ربما يكون هذا الرأي صائبا إذا كان المدرب الجديد مكلفا من الناحية المادية وعاطلا عن العمل، والحقيقة أن منتخبنا ممنوع فقط من المقابلات الرسمية، لكن له الحق في المقابلات الودية، يعني، حنا بصح شادين كونجي، ولكن كاين ما يدار، ومثل الجيوش التي لا تخوض المعارك وتشارك في الأعمال الإنسانية والتنموية للبلاد، لماذا لا تبرمج الجامعة مباريات ودية للمنتخب لتكريم اللاعبين الدوليين الذين لم نودعهم بالتكريم الذي يستحقون؟ لماذا لا يستغل منتخبنا هاد الكونجي ويلتفت إلى أبنائه كالتيمومي، خيري، بودربالة، البياز، الحداوي، بصير، نيبت، كماتشو، حجي.. في مباريات ودية؟
- في خبارك الميريكان والنگالزة بغاو يلعبو معانا؟ باش زعما يعيقو بالجزائر·
- صافي غادي يتزرفو، واش اللعابة ديالنا بحال ديال الجزائر؟
- بحال بحال، علاه آشنو الفرق؟
- اللعابة ديال الجزائر كيديرو الفاصمة على ريوسهم وكيدخلو يلعبو، واللعابة ديالنا والله ومادارو الدهنة على ريوسهم لا دخلو.
=============
نافذة
واش اللعابة ديالنا بحال ديال الجزائر؟