اش هاد التسيب. شكون عطى الحق لرئيس الوداد البامي يشري كلشي تذاكر 200 لماتش الوداد والاهلي

كاينين شي وحدين كيعتاقدو باللي هما فوق القانون فوق النظام فوق كلشي. كيعتاقدو باللي بفلوسهم ولا بفلوس اللي مخدمينهم فحالة سعيد الناصري رئيس الوداد البيضاوي غادي يقدر يدير اللي بغى. هاد الرئيس وفق ما علمته "كود" شرا جميع تذاكر 200 درهم الخاصة بنهائي الوداد البيضاوي والاهلي المصري السبت الجاي. شرا 580 بييي بشي 11 مليون سنتيم.
كاليك حقاش غاديين يجيو ضيوف من الفيفا والكاف ووو وخاص تذاكر. هاد الشي ماشي شغلك. الضيوف عندهم تذاكر خاصة بيهم. بحال هاد الشي اللي سخسخ جمهور الوداد البارح وخلى وداديين من الربعة الصباح حتى لطناش النهار باش يلقى تذكرة. حقاش بيان الجامعة كيقول كاينين تذاكر 30 درهم و50 درهم و200 درهم اذن علاش كانو كاع فالبيان ايلى هاد الرئيس شراهم كلشي.
الوداد كبيرة على الناصري ولا غيرو. هادي الوداد عندها تاريخ. تاريخ مجيد ما عمر شي واحد من الاحزاب ولا من الداخلية سيرها حتى جا هاد البامي اللي ما احتارمش الجمهور بهاد التصرف