يوميات ابيدجان: الضغط على رئيس الجامعة غادي ويتزاد. عشنا وشفنا رئيس جامعة كيديرو معاه الجمهور سيلفي

فوزي لقجع رئيس الجامعة الملكية لكرة القدم منرفز مستريسي بزاف. كلو تركيز على الماتش واخا هو ما لاعبو ما مخطط ليه. مدرب الاسود رونار قال فالندوة الصحافية البارح باللي هاد الشي وفر ليه كلشي باش يدير خدمتو. رونار بتجربتو وحنكتو كيوجد لجميع الاحتمالات. عليها زاد "الرباح داروه اللعابة والشي لاخر انا المسؤول عليه" ماشي بعيد يكون موجد استقالتو ايلى ما كانش تاهيل. لكن فهاد الفرضية ممكن تمس حتى رئيس الجامعة. المغاربة عندهم امل كبير يتاهلو. باغيين يفرحو. اليوم ايلى كان التاهيل رونار ولقجع غاديين يكونو ابطال وفحالة العكس السبان كلشي يمشي ليهم. هادي هي الجلدة
غير المثير فالقجع انها اول مرة كنشوفو رئيس جامعة واقف على شغلو حاضر بلحمه وترفيزه فالتداريب فكل التفاصيل. اول مرة بحال البارح كيجي الجمهور كيبوسو ويتصور معاه سيلفي. قبل شكون اللي يشوف قبل ما يقرب حسني بنسليمان وبعدو شكون اللي يبغي او يتلاقى مع علي الفاسي الفهري. دابا كلشي تبدل مع لقجع. حاضر كيتصور كيعطي تصريحات كيحرك.
هاد الشي مع التاهل مزيان بزاف ولكن فالحالة الاخرى القضية صعيبة