علاش الهضرة مابقاتش على كاس العالم ونقاش كروي وانما على الروسيات ، والفتوحات القضيبية لي غادي يدير الجمهور المغربي ؟

—
ربما كاع الجمهور الكروي بالعالم كيعتابر تأهل المنتخب ديال بلادو لكأس العالم هو انجاز كبير لي غادي يسعد هاد الجمهور ، ومن بعد التأهل جمهور كل فرقة راه كيحلم بأن المنتخب ديال بلادو يحقق شي انجاز تاريخي على قد جهدو ، كاين لي غير التأهل للدور التاني كافي بالنسبة ليهم ، كاين لي كيشوفوا منتخبهم كيستاحق الكاس ، المهم النقاش كيبقى كروي ، إلا عندنا فالمغرب النقاش الكروي تحول لنقاش كزاوي ، والهدرة كاع مابقات على كاس العالم وانما على الروسيات ، والفتوحات القضيبية لي غادي يديرو الجمهور المغربي تم ، وطبعا هادشي كما يتوهمون على حساب المغربيات اللواتي ستبور سلعتهم ، حيث الكوليان ديالهم للأسف غادي يجيبوها روسية .
كيفاش حتى تحول التأهل لعرس كروي بحال كاس العالم عند بعض المغاربة إلى معركة بين البنات والولاد على الروسيات والرواسة ، حيث سبقلينا تأهلنا لكاس العالم ف 94 و 98 وماداروش لمغاربة هاد الحالة ، إلا أنه هاد المرة حنا قدام جيل محضر حتى على شي منتخب مغربي فكاس العالم ، مكيعقلش على الداودي ملي طاحت ليه السلسلة ديال الذهب فالتيران وكلس يقلب عليها ، ماتفرجش فالبيوتة ديال بصير وكيعرفو غير كمول قهوة ماشي كهداف ، هاد جيل كبر حل عينيه على الأنترنيت ، وطبعا مابداش منها كبلاصة للتعلم والتثقيف والإنفتاح وإنما بداها من باب البورنو ، وأول فشلوق شافو راه ديال شي بورنسطار مصاوب عند أطباء التجميل وفق المعايير النادرة فالسوق ، خرج للواقع لقى الأمور عكس ذلك ، داك اللون نادر جدا وهو ماشي جوني سينز مايقدرش يدير كاع البوزات لي شاف ، اذن قلبها عدوانية مجانية اتجاه بنات بلادو ومكيترددش فاي مناسبة باش يعايرهم وينتاقص منهم ، علما أن حتى الجيل ديالنا تغنى بأغنية نديها كاورية كونطرا عليك ، ولكن غير من باب رد الإعتبار لاغير ، ومن باب هلوسات سكران ، غير يسحى ويسيفط عشرين ميساج .
أي واحد يمكن ليه يلاحظ سوء الفهم الحاصل بين البنات والدراري ، لدرجة انعزالهم فمجموعات مغلقة خاصة بالتآمر والسخرية والتبخيس من الجنس الآخر ، علما أنهم بجوج محتاجين لبعضياتهم ولكن على حساب مقاسهم لي مكاينش فالواقع وإنما فالانترنيت والتلفاوة، حتى ولا عندنا جيل الكسدة فالواقع والدماغ فالإفتراضي باغي يعيش الحب على طريقة المسلسلات ويمارس الجنس بطرق برازرس ، والنتيجة هي هاد العدوانية المجانية اتجاه بعضياتهم وهاد حوما المنشورات والفيديوات لي منتاشرة فالويب حاليا ، ديال بنات كيعايرو الدراري لي باغين الروسيات ودراري كيعايرو البنات حيث مكيشبهوش للروسيات وحيث موسطاجات ولكن متطلبات ، وفالواقع كاين بنادم واصل فيه الكبت للسقف ، لدرجة حول تأهل المنتخب لعرس كروي لغزوة جنسية مستقبلية .