غير داوي

بقات تلتيام

كما هي العادة دائما قبل حلول الديربي الأشهر في المغرب، يسيطر الحديث عن اللقاء المرتقب على كل أحاديث الكازاويين اليومية، ما كاين غير الحمرا والخضرا هاد ليام، مشجعو الفريقين يتحرقون شوقا لمتابعة هذا اللقاء المصيري يوم الأحد، كي يضعوا حدا لكل هذا الضجيج الذي يحدث في كل مكان، يعني كلشي باغي هاد تلتيام إمتا تسالي باش اللي كيحل فمو دابا، يدخل سوق راسو نهار الأحد.
- وتعالي يا المرا شوفي، هاد الوداديين والرجاويين غادي يقتلو بعضياتهم·
- آهيا ميمتي فين هاد الشي؟ في الزنقة ولا في التيران؟
- لا، في لانطيرنيط·
- خلعتيني، إيوا طفي البيسي وغادا تتفرق الجوقة·
من محاسن الأنترنيت أنه يمنح الجماهير الفرصة للتعبير عن مشاعرها بكل حرية دون خسائر، وفيه يصطدم الغريمان دون إراقة نقطة دم واحدة، بعض الخطرات كيبان ليك بحالا النص غادي يمشي الكوميسارية.. لكن الحقيقة أن كل ذلك الضجيج حدو البيسي، ولعل منتدى كوورة مغربية الإلكتروني أكثر المواقع التي تستطيع أن تستوعب الخلافات بين أنصار الفريقين دون أن تحيد عن الروح الرياضية، ومن خلال التعليقات يبدو واضحا أن معنويات الوداديين بعد الإنتصار على الواف أعلى من معنويات خصومهم الرجاويين بعد الهزيمة أمام الماص، إلا أن ذلك لم يمنع الجماهير الخضراء من مواصلة تخراج العينين، ومنها من دعا إلى عدم الخوف، واستغلال ثقة الودادي الزائدة لجعلها نقطة ضعف منها يتسلل النسور ويحققون النصر، كما عبر أحدهم في جملة بليغة (دارونا في الكروش، ونهار الأحد نزورو فكروش)·
- وراه بصح، غادين المهاجمين ديال الراجا يزورو البوطو ديال الوداد على بكري·
- على بكري كاع؟ هادي إيلا شي لعابة ما ظلوش سهرانين سامدي سوار كلو حتى الصباح كيف العادة·
- هاد الشي ما بقاش، من الديربي غادا تولي الراجا رمز ديال الأخلاق ونموذج ديال الإنضباط وهاداك الشي علاش جبنا الحاج الجرموني والحاج جريندو·
قد تبدو أزمة الرجاء أزمة تربوية بالأساس، لأنها حطمت الرقم القياسي في التوقيفات التأديبية، كلشي ولى عندو سوابق، اللي ما مضروبش بجوج سيمانات تلقى عندو شهر موقوفة التنفيذ، لكن هذا ليس عيبا ولا مؤشرا على ضعف رجاوي محتمل، فقد يعيد اللاعبون المعفى عنهم مؤخرا سيناريو المهاجم الإيطالي باولو روسي مثلا اللي خرج من الحبس ديركيت وولى هداف مونديال إسبانيا، غير أن بعض الرجاويين في بعض المقاهي صاروا ينكرون أية صلة لهم بالكرة المغربية في الوقت الحاضر، ويتفادون الحديث عن الآن ويهربون بمجادليهم إلى الماضي، تجنبا للحرج أمام أي ودادي ناشط.
- أنا ما بقيتش كاع كنتفرج في الكرة ديال المغرب، لا في الراجا لا في السلكسيونا، باراكا علي غير البارصا·
- وقول غير شحال غايديرو نهار الأحد؟
- ديما خمسة، واخا الوداد تنسى·
- هاداك الشي كان أيام الحليب ودانون.. واليوم الحليب تقاضى، ما عندكم دابا غير الحريرة·
===========
نافذة
إيوا طفى البيسي وغادا تتفرق الجوقة