ازمة جديدة بين البي جي دي وبين الاحرار. قيادي كيفاش ناطق رسمي للحكومة حولو لتمرير خطاب حزبو ودخل صلاة الفجر ونسى الداودية واللي معاها

مع هاد الكز اللي كنعيشو فيه٬ شوية بدات الحياة السياسية كتخرج من الجمود اللي بدا من نهار وصل ابن عرفة للحكومة. ضرب هنا ورد هناك. المهم كتحرك. بعد ازمة الاحرار مع البي جي دي على خلفية تصريحات رئيس الحكومة السابق في مؤتمر شبيبة الحزب واللي حاول زعماء الاغلبية البارح الخميس يلقاو ليها شي حل٬ خرجات ازمة جديدة. مصدر "كود" قال ان الاحرار مقلقين بزاف هاد المرة على تصريحات مصطفى الخلفي الناطق الرسمي باسم الحكومة البارح فمؤتمرو الاسبوعي. وعلاش؟ مصدر "كود" اوضح ان الخلفي اللي قال فهاد المجلس ان المجلس الحكومي ما ثارش ولا درس ما نسب لوزير =الشبيبة والرياضة= حول شي مخيمات كيفيقو الاطفال مع الربعة الصباح يصليو لفجر . واخا هاكاك الوزير عطى موقف. قال "كحكومة لم تندارس التصريح حتى اعطي التصريح كحكومة ولكن ساعلق على قضية واحدة. قضية صلاة الفجر لا ترتبط بحزب سياسي هي موجودة قبل الاحزاب السياسية" ثم عاد وقال "لا يمكن ان اعبر عن موقف منه عن الحكومة حتى اعود للتصريح وله". المصدر اوضح انه مرر موقف حزبه مستغلال الفضاء الحكومي وصفته كناطق باسم الحكومة
واكد المصدر ل"كود" ان العثماني خاصو يتاخذ القرارات الحاسمة باش يضبط صحابو. الغضبة كبرات حقاش رشيد الطالبي العلمي في لقاء مع الصحافة الاربعاء كما حضرته "كود" تحدث عن العشوائية في المخيمات وعن بداية تحديد برنامج قبلي٬ وقال ان من تجلياتها ان شي جمعيات كتفيق الاطفال مع الربعة الصباح يصليو العصر وشي وحدين كيدير الامداح واخرين كيديرو الداودية وشي كيخربقو فالرسم وشي اشكال فنية اخرى. يعني كاينة فوضى. وتحدث عن الفساد والرشوة وقال خاص مخيم يليق بالاطفال يؤطره ناس مؤهلين