علاش والي كازا ما فيدوش؟ شوفو اش دارو لشاب كان فديوانو وكيفاش كاتب عام ومسؤول فات سن التقاعد لاعبين العشرة

والي اكبر جهة فالمغرب جهة الدار البيضاء سطات عبد لكبير زهود ديما كيتعطل برنامجو مخربق. علاش حقاش ما عندوش مدير ديوان رسمي. هاد القصة ديال ديوان الوالي كيتبين شخصيتو. كتيبين شكون كيحكم. باش جا زهود حيد مدير ديوان الوالي السابق سفير وعين باشا اسمو رشيد فهاد المنصب. طبعا منصب مهم بحال هادا ناضو ليه وطيروه. وهادي شهرين جاب مدير ديوان اخر فشي شكل.
شكون عينو فهاد مدير الديوان حتى طار. هو مدير الشؤون العامة الكورامي اللي عندو ولد كوميسير كان اشار اليه تقرير المجلس الوطني لحقوق الانسان على الحسيمة وجبدوه بعض المعتقلين وحولوه لطنجة٬ طبعا الكاتب العام للولاية حتى هو لعب دور حتى طار هاداك الباشا الشاب.
باش يتم الانتقام منو رجعوه تابع لمدير الشؤون العامة اللي وصل ل65 عام ومازال ما خرجش تقاعد.
فضيحة الديوان غادية تزاد اكثر بعد ما جابو شي حد اسمو تقي الدين هادي شهرين لهاد المنصب واخا ماشي بشكل رسمي. هاد السيد مكلف بالبروتوكول.
دابا باش تسمعو هاد الوالي ما داير والو عرفو باللي فبيتو اي الديوان والتدبير اليومي للاجندة ديالو فيها تخربيق. والي ما يهش ما ينش وكيحكمو فيه.