محمد الرزمة البرلماني التجمعي ل”كود”: الجيش المغربي خاصو يتدخل حيت البوليساريو حسات براسها كتموت والأمم المتحدة قرارتها ميتة

قال البرلماني التجمعي محمد الرزمة أن الاجتماع اللي داز اليوم الأحد فمجلسي البرلمان وعقداتو لجنتي الدفاع الوطني والخارجية بمجلسي البرلمان على “استفزازات البوليساريو”، ان المتحتوى ديالو تلخص أنو مغاديش تقوم دولة فالاراضي المحررة حيتاش “البوليساريو” مؤخرا اعلنت على انها باغية دير وزارة وغادي تبني مواقع ديال الجيش ف”البير لحلو”.
ماشي غير هادشي القيادي التجمعي الرزمة قال في تصريح ل”كود” ان “هاد الجبهة الوهمية رجعات كتمنع المينورسو من مزوالة الأعمال ديالها ومراقبة وقف إطلاق النار حيتاش الاتفاقية ديال وقف اطلاق النار كانت واضحة المعالم ومخاص يتغير فيها والو.
وأضاف قائلا: “الدولة المغربية دبا بين أمرين، إما تسمح بهاد الامر وتصبح متجاوزة، أو ترجع أمر جديد وواقع آخر، او غادي تكون حاسمة وتوقف الامر من دبا، وحنا قلنا كبرلمايين خاص داك المناطق ينضمو للمناطق المغربية ويتعلنو فيهوم اسماء ديال مدن مغربية وعلاش منمشيوش نسكنو فيهوم كاملين”.
وبخصوص واش خاص الجيش المغربي يدخل، أكد التجمعي الرزمة ل”كود” أنه “بطبيعة الحال خاص الجيش يدخل الا كنا غادي نمرو هكا خاصة أن جبهة البوليساريو بدات كتحس براسها كتموت، وجربو جميع الميادين ومنها حقوق الانسان والثروات الطبيعية ودبا خاصها تحط المغرب فواحد الوضع باش يبقا يتعامل معاها”.
“كود” سولات البرلماني الرزمة على واش المغرب خاصو يوقف علاقتو مع الأمم المتحدة؟ فأوضح قائلا: “هي أصلا عبر التاريخ معمرها حلات شي مشكل، وكان الاتفاق ديال وقف اطلاق النار اللي فيه مصلحة ديال البلاد بالدرجة الأولى لكن الآن رجعات الامم متجاوزة حتى من عند هاد الكيان الوهمي =البوليساريو=، ودبا مابقاش خاصنا نساينو القرارت ديال الامم المتحدة حيتاش قراراتها غير فعالة فالعالم”.