نهاد فتحي تكتب ل”كود”: نهار جبت سعودي للدار و ماناكنيش

شحال هادي فاش كنت صيليباطير و مدمنة على تيندر، تماتشيت مع واحد السعودي ما بيهش و كابر فميامي للي فميريكان. فلول ما بغيتش نتلاقا بيه حيث ماكان فيا للي يخرج و الدار كانت مرونة و مافيا للي يجمع. بقى تايلح شويا، ڭال ليا هوا ڭالس فكازا غير لبضع ساعات و من بعد غادي للبرازيل، و باغي غير يقتل الوقت. كأي سعودي كايحتارم راسو، عطاني تفاصيل ماعندي ماندير بيهم شخصيا، بحال “أنا ڭالس فالصوفيتيل”، غيرباش يفكرني بللي سعودي و عندو الفلوس. ڭلت ليه مزيان، ڭول ليهم يعطيوك الشكلاط و جوج قراعي ديال الروج و آجي
مني دخل تسالمنا و ڭلس فالكونطوار و حليت قرعة دالشراب. ڭال ليا عائلتو لاباس عليها و لكن واخا هاكاك دار راسو براسو بواحد الاختراع عجيب. ڭال ليا السواعدة فاش كايديرو العراضات كاياكلو فواحد القصريات ضخمة وغارقة — بحال هادوك للي فالتصاور للي تانبارطاجيوهم فالفايسبوك باش نضحكو عليهم — و تايشبعو قبل من يوصلو للقاع، الأمر للي كيخلي بزاف ديال الماكلة كاضيع. ناض هو اختارع واحد القصرية فيها حديدة مصاوبة بحال الضهر ديال الجمل كاتدار فالقاع باش يبان داك الشي عامر بلاما تضيع الماكلة. ڭال ليا هاد الاختراع التافه دخل عليه ملايين الدولارات، و دابا كايراقب الأعمال عن بعد و كايضل يسافر. فداك الوقت كانت عندو غير ثمنية و عشرين عام.
ڭلت ليه شكلو داير بحال شي هندي. ماحملنيش، شاف فيا بحالا ڭلت ليه شكلك بحال الخرا وانا ماعنيت فيها والو. نسيت بللي السواعدة كايستعبدو الهنود وكايشوفو فيهم بنفس النظرة للي تايشوفوهم بها المغاربة: شعب خانز تايبول و تايخرا فالشانطي. باش نبدل الموضوع، سولتو واش بصح السواعدة تايشوفو فالمغربيات غيرالعهر و السحور. ڭال ليا طبعا و لكن فمسألة الجنس، ماشي غير المغربيات حيث السعودي للي لاباس عليه واثق فقدراتو المالية و عارف بللي ڭاع العيالات عندهم احتمال يوليو عاهرات إلى عطيتيهم الثمن المناسب. ڭال ليا كيم كارداشيان بروحها كون ماكانتش مجوجة ماغاداش تڭول لا إلى عطيتيها مليون ديال الدولار.
من بعد ڭلسنا نتفرجو فواحد الفيلم و تانديوي و تانضحكو، مابقيتش عاقلة علاش حيث كنت سكرت، ولكن ما دار حتى شي حركة ماشي هي هاديك. مني جا الوقت باش يمشي، عيط لشيفورو عنقني و شكرني و مشا بحالاتو.
مانكذبش عليكم، مني شفت ميامي و الملاير و الشهامة، طمعت شوية و بغيت نبقى معاه على اتصال باش نسحرو بالمفاتن ديالي لعل و عسى يكون شي مستقبل بيناتنا. من بعد أيام صيفطت ليه مساج فالواتساب باش نسول فيه زعما و نڭول ليه يعيط ليا إلى رجع المغرب. ڭال ليا ضروري، بصدر رحب، و لكن بشرط: أنني نخليه يمارس معايا الجنس من اللور. وانا نبلوكيه.