واش المقاطعة فالفايس ولا الواقع؟ كود خرجات وجاتكم بالصور ولخبار (صور)

“كود” خرجات هاد الصبح شدات شارع “الروداني” فكازا فطريق الجديدة باش تشوف الأثمنة ديال المحروقات وتأكد منهم.
وتفاجأت بكون الأسعار تقريبا ذاتها فجميع المحطات، افريقيا دايرة 9.9 درهم لثمن المازوط، بحال “وينكسو” و”بيتروم”، أما بالنسبة ل”سوماب” فدايرة 9.8 للمازوط العادي.
وبالنسبة لليصانص كاع المحطات دايرين نفس الثمن، اي 11.18 درهم، من غير “بتروم” الي زايدة فيه وحاسباه ب11.24 درهم.
من بعد الجولة ديالها على المحطات، “كود” مشات تغدات ف “افريقيا” الي جات قبل من الدخلة ديال الطريق السيار، ولقات المطعم عامر غادي يطرطق بالناس، لدرجة أن الطواجن تسالاو ليهم، وبقى غير واحد ديال الدجاج.
سولات “كود” الناس الي خدامين فالمطعم: “واش كاين شي تغير هاد اليوماين؟” وجاوبوها بدون استثناء بلي “كولشي عادي، الخدمة غادية كسائر الأيام”، وسولات حتى الي خدامين كيعمرو ليصانص والمازوط، والرد ديالهم كاملين كان على التالي: “كولشي نورمال، كالعادة…خدامين بنفس الوتيرة الي كنخدمو بها ديما، كنعمرو نفس العدد ديال الطونوبلات، ماتبدل والو”.
ولاحظات كود خلال زيارتها ل”افريقيا” أن الناس خارجة من المطعم وفيديها قراعي ديال “سيدي علي” كيشربوها عادي بحالا ما واقع والو.