علمت "كود" من مصادر تجمعية، أن رئيس حزب التجمع الوطني للأحرار، عزيز أخنوش، سيقوم صباح يوم الإثنين المقبل (9 يناير 2017)، بزيارة مدينة فاس لعقد لقاء مع التجمعيين بالعاصمة العلمية. فحسب المصادر نفسها ل"كود"، فإن هذه الزيارة تأتي في إطار الجولات الجهوية التي يقوم بها الرئيس أخنوش لعدد من المدن والأقاليم. هذه الجولة للعاصمة العلمية فاس، حسب المصادر نفسها غادي تكون عندها دلالات كبيرة. فحسب مصادر "كود" فهذا اللقاء غادي يكون بفندق مصنف لكن المثير فهادشي هو كاين شي أعضاء ديال المجلس الوطني للحمامة وأعضاء معندهوم اخبار بهاد الزيارة ويعني أن الجهة المنظمة لهاد اللقاء بالمدينة كدير اللي بغات لكن اللي معارفينش هي أن اخنوش راه كادير هاد الجولات باش ينقي الحزب من الناس اللي خرجو عليه خاصة فالانتخابات الأخيرة وجميع المقربين من "الفعفاع" باي باي. الحمامة حسب المتتبعين للشأن المحلي بالعاصمة العلمية كلات لعصا بزاف مؤخرا ومجابت والو فالانتخابات الجماعية وحتى البرلمانية خدات مقعد واحد جابو رشيد الفايق رئيس الجماعة القروية اولاد الطيب. فمثلاً كاين شي وحدين جابوهوم معندهوم علاقة وعندهوم غير مصالح وتقدمو فالانتخابات البرلمانية ومع ذلك مربحو والو. ودبا غير وجدو راسكوم راه أخنوش غادي يبدا التغربيل وعارف كولشي على فاس وحتى الناس اللي كتقرب منو لأهداف معينة.. وبطبيعة الحال أخنوش راه داير تنسيق مع الوزير عبو اللي عندو معاه علاقة كلها مبنية على الثقة باش يخدمو مزيان الجهة وينجحو مستقبل الحزب اللي كلا لعصا بزااف.
