المشكلة فالبلاد سياسية وخاصها حل سياسي والدولة ما يمكنش تكون جادة فمحاربة “الفايك نيوز” ودارت مسيرة ولد زروال وبنكيران يخرج من الصحرا ولحمير فالرباط وخوات الانتخابات من معناها الديموقراطي

الحكومة قالت فبيانها البارح تأكيدا لتصريحات الناطق الرسمي باسمها مصطفى الخلفي بعد المجلس الحكومي باللي غادية تحارب الفايك نيوز”.
البيان قال انه حماية للنسيج الاقتصادي للمغرب وللمصالح الوطنية٬ فإن الحكومة “تؤكد حرصها على ضمان القدرة الشرائية للمواطنين وحزمها في مراقبة السوق وجودة المنتوجات الوطنية، يوازيه نفس الحرص على التصدي بكل حزم لكل المحاولات الهادفة إلى النيل من المقاولات المغربية والاقتصاد الوطني”.
وانها “لن تتسامح بأي شكل من الأشكال مع استغلال مواقع التواصل الاجتماعي لنشر أخبار زائفة بسوء نية أو إشاعات من شأنها الإضرار بالمكتسبات المحققة في بلادنا على مختلف المستويات الاقتصادية والاجتماعية والسياسية والأمنية”.
وانها “ستعمل الحكومة على تقييم المقتضيات القانونية الجاري بها العمل في هذا المجال، وتلك المرتبطة بالأسعار والمنافسة” وان “حماية الحريات الأساسية للمواطنين، وفي مقدمتها حرية التعبير، تعتبر خيارا استراتيجيا لا رجعة فيه، حفاظا على المكتسبات الوطنية واحتراما للدستور”.
يعني اللي خرج شي خبار زائف بسوء نية يتم متابعته. هاد الشي راه كاين. موجود اليوم فالقانون. والحكومة فبدية العام “قانون رقم 71.17 لتغيير القانون رقم 13-88” باش تزيد تشدد ها القانون. دابا المقتضيات القانونية كاينة ويطبقو غير هاد الشي اولا.
علاش الحكومة عوض ما طبق القانون دارت هاد البيان.
المشكلة فالمغرب سياسية. سياسية من نهار تحيد عبد الاله بنكيران من تشكيل الحكومة وجابو بنعرفة. كان احباط كبير. احباط اللي صوتو عليه وجابو حزب ما دا حتى حاجة اللي هو الاتحاد الاشتراكي ودخلوه للحكومة بزز وفرضو عليه الوزرا. فهاد اللحظة ماتت السياسة. ما بقاش شي حد كيواجه الرأي العام كيخاطبو. كان بنكيران كيشكل خطر علىِ شي وحدين وباش حيدوه وقع الفراغ. للي وقع كيفسر جانب من الاحباط اللي كيعيشو المواطن. فكاع الميادين.
دابا الحكومة ما عندهاش مصداقية بزاف باش تحارب الفايك نيوز. حقاش هاد الفايك نيوز استعمل بشكل كبير باش يضرب بنكيران. دارو شباط باش قال باللي بنكيران داعش وكان مخطط للاطاحة به ف2013 وداروه باش خلاو شباط يخرج لحمير فالرباط. دارتو الدولة فمسيرة ولد زروال فكازا. جابو ناس مساكن ما عارفين والو وقالو ليهم ديرو شعارات غربية منها “بنكيران خاصو يخرج من الصحرا”.
حالات كثيرة بينات باللي جهة فالدولة استعملات هاد الفايك نيوز باش تحارب خصومها. لذا ما يمكنش لحكومة ضعيفة بحال هادي تجي تقول باغية تحاربو من اجل مصالح الدولة العليا. اللي تقدر تكون مصالح دنيا لمواطنين وصافي