عبثية السياسة عندنا. نزار وشباط بوحدهم مرشحين للامانة العامة وولد الرشيد اللي غادي يطلع. ذكاؤو وذهاؤو خلاه ما يترشحش لمنصب باش ما يتواجهش مع اللي كانو سباب فاكديم ازيك

حمدي ولد الرشيد هو الشخصية المحورية اليوم في حزب الاستقلال. قوتو ما جايبهاش من هيمنتو على اجهزة الحزب فقط كنتكلم على الاجهزة اللي غادية تنتخب فهاد المؤتمر٬ بل من خلال عمله على رأس الجهات الثلاث الجنوبية. بهاد الشي خلى الحزب يربح نص مقاعد مجلس المستشارين ويدي جوج جهات اللي عند الحزب بلا ما نهدرو على الجماعات والغرف المهنية ومجلس النواب. باش تاخدو فكرة على قوتو عندو فمجلس المستشارين 50 بالمائة اللي عند الاستقلال. هاد القوة كانت كفيلة تخليه يكون امين عام وكون تقدم موحالش الامين الحالي حميد شباط كان يقدر يتقدم قدامو. هو بذكاؤو وذكاؤو عارف ان جهات فالدولة ما عندهاش معاه. هاد الشي ماشي كلام بل فعل. عاش احداث اكديم ازيك وشاف الحرب اللي دارت من قبل البام واللي ورا البام ضد عائلتو ماشي ضد الاستقلال. خرج منها رابح وبقى واقف وخسرو خصومو وخسرات البلاد اللي دخلات فهاد الحرب المدمرة.
اليوم دار القراءة اللي بانت ليه مزيانة وراهن على نزار البركة وبعد صديقو وحليفو السابق حميد شباط. غادي يكون عندو حضور قوي بزاف فاجهزة الحزب. تفادى يتقدم باش ما تعاودش اكديم ازيك اخرى بطريقة اخرى.
اللي كيعيشو حزب الاستقلال اليوم نتيجة لفتوى فوقية قالت لحميد شباط باش جابتو امين عام للحزب: خرج من الحكومة. خرج وباش سالاو منو لاحوه. غير نساو باللي شباط انتحاري وبدا كيطرق القرطاس فينما جا. شباط فاقد للمصداقية. حتى حد ما ماديها فيه. كلشي اللي كيقولو اليوم ولو صحيح فقد معناه. حقاش تمثيلو اليوم الاول لمسرحية الخروج للمعارضة ما كانتش متقونة.
دابا كاين سيناريو اخر. نتسناو نشوفو اش غادي يعطينا