سكوب. تفاصيل مثيرة على هروب مدير المدرسة الامريكية فكازا. هددوه: اما دير لينا اللي بغينا ولا نقولو عليك بيدوفيل” وها كيفاش دخلات القنصلية الاميركية

توصلت “كود” بمعطيات مثيرة بزاف حول هروب روبير فان دير اييكين٬ مدير المدرسة الامريكية فكاليفورنيا فكازا فالمغرب اخيرا. حسب مصدر “كود” فان هاد المدير اللي عندو الجنسية الكندية اللي كان هاد الموسم الدراسي يكون هو اللخر ليه تعرض للتهديد وهو اللي خلاه يهرب.
باش تفهمو هاد التهديد وطبيعتو اجيو نعاودو القصة من الاول كيف حصلات عليه “كود” من مصادر من المؤسسة. المدير اللي دار العالم وكان مدير فدول كثيرة٬ كان عندو الصداع عن شي حد اسمو السبتي. هاد العائلة احتجت علي المدير بسباب نقاط ولدهم. بغاو يرسلوه لجامعة برينستون الاميركية ولكن وقع شي مشكل فالتنقيط. هما كيتاهمو المدير باللي تسبب فتغيير النقط وهو كيقول باللي حصل شي مشكل.
المهم ناض الصداع. لكن اللي خلعو بصاح ماشي هاد الشي. فحسب مصدر “كود” فان جوج عيالات من اللي ولادهم كيقراو تماك وملايرية دخلو عند المدير٬ يشرح مصدر “كود”٬ وهددوه “اما تلقى حل مع ال السبتي ولا غاديين يتاهموك بالبيدوفيليا. وحسب مصدر “كود” فان هاد لمرفحات زادو “انت ضريف ولكن غاديين نشهدو ضدك”. السيد ما سجلش هاد التهديد.
هاد الشي صدم بزاف بزاف المدير الكندي اللي قبل بان ليه المغرب غريب فيه مرفحين دايرين ما بغاو “السيد كان فالصين وعدد من الدول. ما عمرو كره شي بلاد بحال المغرب حقاش فيها هاد التخلويض” يشرح مصدر “كود”.
بعد ما تصدم بهاد الهدرة اتصل ببعض اولوياء تلاميذ المدرسة الاميركية ونصحوه يمشي فحالو حقاش القضاء فالمغرب ما غاديش ينصفو وحقاش شوهتو غادية تولي عالمية. وفق مصدر “كود” فانه اتصل بقنصل امريكا فالدار البيضاء وكان رآيو حماية المؤسسة عبر حماية سمعة مديرها من لكذوب والاشاعة. بعدها بات ما صبح وخلى رسالة وحدة فيها “مع السلامة”. قبل هاد الرسالة كان خرج عائلتو.
هاد المدير وفق مصدر “كود” ما بغاش يوقع ليه اللي وقع لمدير فالمدرسة الاميركية فاندونيسيا. طيحو عليه الباطل فتهمة مماثلة وتشد فالحبس وهو مظلوم.
مشكلة المدرسة الامريكية وفق مصدر “كود” ان اولياء واباء التلاميذ كيحكمو وهاد الشي مخلي اللي عندو شي سلطة يدير ما بغى.
هاد القضية بينات وقف مصدر “كود” باللي بعض هاد لملايرية اللي كيقريو ولادهم فهاد المدرسة٬ ما كيخافو من حد ما كيديوها فحد. مصالحهم اولا وقادرين يشريو كلشي ويتاهمو كلشي
المثير فهاد الهروب ان السيد دارها وما خبر حد. دابا كلشي خايف فالمدرسة حقاش كاينين الامتحانات خاصة الباكالوريا.