مصدر من الداخلية ل"كود" في قضية مقتل بائع السمك بالحسيمة: ها للي وقع والقضية بيد القضاء واللي حصل يودي والسيد لقاو عندو 500 كلغ اسبادون ممنوع صيدهم دابا

توصلت "كود" بمعطيات بخصوص مقتل بائع الصيد بالحسيمة اثناء اتلاف "حوته". حسب المصدر نفسه فان البائع "ماشي بائع متجول" وانه "حجزو ليه 500 كلغ من ليسبادون اللي ممنوع يتصيد فهاد الوقت حقاش كاينة الراحة البيولوجية". المصدر اضاف ان البائع "صيدها من الناظور وجابها للحسيمة فسيارة ميرسديس 207 وتساءل واش هاد وسيلة النقل صالحة للنقل الصحي ولا للا".
لكن المثير في هذه القضية هو ما قام به المندوب الجهوي للصيد البحري اللي وقفوه البارح. السيد باش شد الكمية فدائرة نفودو بالحسيمة قرر يتلف هاد الكمية. قانونيا وفق مصدر مطلع ل"كود" عندو الحق. وقد طلب الدعم من الباشا وجاب كاميو ديال الزبل وبدا الاتلاف فالشارع العام. فهادي بزاف مسؤولين حقاش ماشي بلاصة ديال الاتلاف وحقاش واخا قرار الحجز وقرار الاتلاف قانوني يضيف مصدر "كود"٬ غير هو غبي بزاف. كان ممكن يعطي الكمية لخيرية ولا للجمعيات تهتم بالفقرا ثم باش قرر الاتلاف كان خاصو يديرو فبلاصة بعيدة وباش جا بائع السمك كان خاصهم يقنعوه ويشرحو ليه ماشي يخليوهم حتى لاح راسو وتقتل حقاش كال ليهم ضيعو لي 12 مليون.
وكذب مصدر "كود" ان تكون النيابة العامة هي المشرفة على الحجز والاتلاف "كذوب اللي مارس اختصاصو هو مندوب الصيد البحري".
طبعا هناك رواية اخرى لصيادة تقول ان الشاب الثلاثيني اقتنى الاسماك بطريقة قانونية وانه استثمر امواله في مشروع يدر عليه دخلا وانه احس بالحكرة ففعل ما فعل.
هناك من يتهم المدافعين على الصيد السري وخرق الراحة البيولوجية باثارة الفتنة غير هو دابا كاين تحقيق يشرف عليه الوكيل العام واوكل الى الفرقة الوطنية للشرطة القضائية. كلشي غادي يبان وكلشي غادي يتوضح.