حكيم بنشماش، أو عبد الحاكم بنشماس، الاسم الحقيقي رئيس مجلس المستشارين المنتخب بعد الانتخابات الجماعية سنة 2015 بطريقة الكل يعرف كيف كانت. ولى بين عشية وضحاها برلماني فمجلس المستشارين ثم رئيسا لهاد المجلس. شكون وجد ليه كلشي. الياس العماري ولي نعمتو وولد منطقتو بني بوعياش. الياس صنعو من الفه الى يائه حتى ولى امين عام حزب الاصالة والمعاصرة. مصادر مطلعة قالت ل”كود”: كيفاش تنتسناو من هاد بنشماش لي فكل اسبوع كايدير دورات تكوينية وسفريات ووو يجي يعطي دروس للحكومة فمجلس المستشارين بخصوص منتدى العدالة الاجتماعية لي فشل العام لي فات وباغي يعاودو هاد العام”. “كود” تقدم ليكم 5 المؤشرات على ان هادي غير مسرحية وباللي حكيم غادي يبقى تابع لالياس العماري وهاد الاخير غادي يرجع للمنصب اللي كان عندو ايام بيد الله والبكوري. يقود كلشي فالظل. المؤشر الاول: حكيم ديال الياس هاد الانتخاب ديال بنشماس بغاو يبيعوه لينا على انه جا بعد رغبة قادها هو وبنعزوز ومحمد الحموتي والعربي لمحارشي ضد الياس العماري. طبعا هاد الشي غير للاستهلاك. حكيم بنشماس فيه كاع ديفوات السياسيين. عندو مشكلة فالكلام كيهدر بالفصحى. شخصيتو ماشي مقبولة حقاش ديما مغوبش. وماشي سياسي ديال التواصل وباش كيهدر كيهدر هدرة كبيرة فاهمها غير هو وشي رباعة ديال اليسار لقديم بزاف هاد بنشماش، لي معروف انه تابع لالياس العماري، الرجل المتحكم في دواليب البام. متحكم فالتنظيم. دار شبكة علاقات قوية بزاف وكيخافو منو ناس البام. هاد الشي ما غاديش يتغير. المؤشر الثاني ريافة يبقاو متحكمين فالحزب البارح قيادي بارز في الاصالة والمعاصرة، قال كلاما دقيقا في حديثه مع “كود”، “الياس هو كلشي وبنشماش راه ديال الياس”، مضيفا :” العماري عارف شنو كايدير وغادي يبدا ينظم الهياكل وغايقوي كولشي باش يواجه البيجيدي ويقلب على خبزتو في الحكومة ديال 2021″. قيادي اخر اكد ان المجيء بحكيم واخا ظاهريا كادو جديد للبيجيدي. غاديين يقويوه. المؤشر الثالث رجالات الياس حاضيين حكيم اغلب مستشاري بنشماش وموظفي ديوانه بمكتب الغرفة الثانية، هم اتباع الياس العماري لي معه فالمكتب السياسي، وعلى رأسهم مصطفى المريزق، صاحب الجولات المكوكية باوربا، والمبشر بحركة “قادمون” التي لا وزن لها في المجتمع، ومن بين الموظفين كذلك سمير ابو القاسم، الملقب بمفكر البام. المؤشر الرابع كول لينا احكيم بشحال شريتي القصر فالرباط حكيم بنشماس تابعاه فضيحة كبيرة تتعلق بالاغتناء السريع. واش مشروع ولا اللا هاداك سؤال اخر. المهم ان شراءه لقصر او فيلا معتابرة فالرباط جبد عليه الصداع. هاد الصداع تناقش فالمكتب السياسي وطلبات منو فاطمة الزهراء المنصوري حينها يخرج ويشرح ويجاوب. طبعا ما جاوبش. فضيحة اخرى بانت فقضية لفلوس هي حادثة سير دارتها بنتو ودخل كاي اب غير المشكلة ان بنتو اللي باقية صغيرة كانت راكبة على رانج. بزاف بزاف بزاف بزاف على سياسي كان عندو موطور هادي سنوات قليلة بزاف. اللي كنعرفو على حكيم انو ماشي رجل اعمال. المؤشر الخامس: المنصوري ووهبي: اووهووري صحاب الريف فالبام كان عندهم هدف واحد هو الحزب ما يطيحش لا فيد المنصوري فاطمة الزهراء لا فيد عبد اللطيف وهبي. هنا خرجات ديك المسرحية ديال غضب ريافة الحزب واقرب المقربين من الياس عليه بل والانقلاب عليه. طبعا المنصوري ووهبي صدقو وتبعو بنشماس وناصروه. وصلو اللي بغاو والحزب بقى عند واحد ما كيهزش الراس فالياس. هاد الشي كيعني ان قضية لفلوس ديال الحزب والحملة ما غادياش تجبد لالياس وقضية قصر حكيم ووو حتى هي تطوات فهاد الحزب. حزب وعد بامور كثيرة وتحول للوزيعة كل مرة وجهة كتنتافع منو. هاد الشي علاش سهل جدا يربحوهم الاسلاميين. صعيبة دير السياسة مع بقايا اليساريين الراديكاليين. حقاش كيكونو جيعانين بزاف وباش يوصلو كيخافو التران يفوتهم وكيقومو باللازم فوقت قصير
