شكون باغي يوصلنا للي كيتعيشو الاردن. كيفاش نشاط ملكي فطنجة تحولو شي وحدين ضد اخنوش ونشرو موقع مقرب بزاف من ال العماري

هناك اشياء كثيرة تدبر فالخفاء. عطات هاد الازمة السياسية اللي عايشها المغرب. الجديد فهاد الازمة هو اقحام رئيس الدولة فهاد الشي. نهاية ماي كان نشاط ملكي فسلا. خرجو دوار الكرعة بشعارات باينة ماليها مسيسين. قالو كنحتجو على السكن. كانت سابقة. كلشي كيعرف باللي فالانشطة الملكية الداخلية كتوجد كلشي. شكون حضر بتفاصيل التفاصيل. كلشي كلشي كلشي. بان باللي كاينة جهة معينة باغية تقحم الملك.
اليوم فطنجة كان نشاط ملكي. دشن محمد السادس “ميناء الصيد البحري والميناء الترفيهي الجديدين”. قيمة الاستثمارات 6,2 مليار درهم. فهاد التدشين جابت السلطات كيف كدير ديما مواطنين. قبل ما يوصل الملك للتدشين ردد شي عدد قليل “عاش المليك”. ثم “اخنوش ارحل”. بدات بحشمة. بحال الى كانوا كيقيسو مدى التجاوب.
شكون جاب هادو لهاد البلاصة وعلاش موقع مقرب من ال العماري =الياس وخوه= نشر الفيديو وقال باللي راه مواطنون كيقولو عاش الملك واخنوش ارحل. يمكن ترجعو للانتخابات التشريعية الاخيرة باش تعرفو هاديك العلاقة القوية. البعض فطنجة مشى بعيد وكيتهم مباشرة باللي اللي رسل هادوك نفس الجهة. اللي رسل هادوك اللي احتجو او دخلهم مع اللي حضرو للاستقبال واللي صور عندو حسابات سياسية مع اخنوش. وصفاها بجبن ووضاعة. منهم واحد بولحية محسوب على العدل والاحسان. الجماعة معروفة ما عمرها دارت احتجاج بهاد الوضاعة. هادا باين قلب الفيستة ومشى مع نفس الشخص.
المقاطعة دارت لشركات ومن النهار الاول قلنا باللي وراها اهداف سياسية. المشكلة فالمغرب سياسية هادا اكيد ولكن التشديد على توريط رئيس الدولة فهاد الحسابات راه محاولة من هادو باش نوصلو للي وصلات ليه الاردن اليوم. الاردن فطريق خطير. فيه اوجه الشبه مع ما عرفته ثورات الربيع العربي واللي رجعات تلك البلدان الى خريف. هادوك اللي كيلعبو هاد اللعب هادا هو هدفهم