هنا روسيا. سحر الجلدة ذوب كلشي. هاد لمغاربة اللي جاو كيمثلو كاع الطبقات. جا شعيبة وكيليميني ولملايرية والكحيانين واللحايا والملحدين والامازيغيين والوهابيين والملكيين والجمهوريين: فسيفساء ما تجمعها غير الكورة

اللي حضر المونديال وتبع اول ماتش للمغرب فايران شاف هاديك اللحمة اللي كتجمع كاع لمغاربة. فزناقي لمدينة الساحرة سان بيترسبورگ كتلاقى مع بنجلون التويمي٬ الرجل الثاني فالبنك المغربي للتجارة الخارجية ومساعد عثمان بنجلون الايمن٬ كيدور مع عائلتو ف”بورشتاين” وبعدها مباشرة مدير شركة كبيرة كيتعشى واخر غادي كيتمشى مع ولادو.
لمرفحين شوية وبزاف حضرو. جاو يشوفو المنتخب. بعضهم ما عمرك تلقاهم فشي ماتش ديال المنتخب فالمغرب. جاو لهاد المونديال. شي كيدير حج وحاجة. حضر للماتش ودار تفويجة هنا. هادو لملعقين. طبعا كاين كيليميني اللي جا وفيه عدد لا يستهان به وكاين شعيبة حتى هو حضر. اولاد غالبا مع صحابهم كيتقاتلو مع الوقت ضبرو على ريوسهم وخالقين السعادة. شي وحدين رجعوها فراشة وبداو كيبيعو توني المغرب اللي ما بقيتيش تلقاه لا فبوتيكة الفيفا فالمدينة ولا فالملعب. الجامعة كانت جابت شي 70 الف توني ولكن لكاع المونديال. تفرقو شي حاجة على عدد من الجمهور وشي وحدين عاودو فيهم البيع. هادو ما مفاكينش وعايشين حياتهم هنا.
فسان بيترسبورگ كاع المغرب حضر. بمعنى كتلقى اللحايا المسدودين واللحايا “كول” واللي ما عندهمش مع الدين كاع. هنا حتى حد ما تقلق من حد. شي صايم وشي عايش حياتو وشبعان بيرا وفودكا.
حتى الانتماء عندو معنى اخر. كتلاقى امازيغي مدور راسو بالراية ديالو ولكن لابس توني ديال شي لعاب ريفي عزيز عليه.
يعني الجمهور بحالو بحال المنتخب. فلسانو كلها ولوغتو. فانتماؤو الجغرافي. كثير فيهم هزاتهم الكورة ونقداتهم من الفقر لمقود. فيه اللي عايش فالمغرب والغالبية العظمى من دول اوربية كثيرة وكاين حتى من اسيا وامريكا جا باش يعيش هاد اللحظة
هاد الجلدة دارت اللي ما يقدر يديرو حتى حاجة. كاين اللي غادي يقول الاسلام يدير اكثر. ولكن يديرها مع اللي مأمن بيه. كاينين مغاربة علمانيين باغيين يبعدوه على النقاش العام او ملحدين ما عندهش كاع مع الدين. هادو الكورة كتجمعهم فهاد المغرب.
هاد الفسيفساء اللي فيها كاع الطبقات كاع الانتماءات كاع التوجهات ممكن ترجع بنفس الوهج ايلى درنا شي ماتش فاعل تارك ضد البرتغال. هاد الشي ممكن على الاقل من قبل الجمهور. غادي يكون كثير فهاد الماتش جايين ليه لمغاربة من المغرب ومن اوربا