هادي يومين انطلق مهرجان الفنون الشعبية احد اقدم المهرجانات في المغرب بعد ما غاب لفترة. الانطلاقة كانت بالفضاء الرائع قصر لبديع فمراكش. كيف ديما المهرجان كيقدم المغرب بتنوع فلكلوره بتنوع ثراته الفني. المغرب الجميل بالالوان المحب للحياة المقبل عليها. تراث ما عندو ثمن. غير كيف فالسابق ديما كاينة مشكلة كبيرة فالاعتناء بمالين هاد التراث. فمراكش ما كينزلو لا فاوطيلات ولا غيرها. كيجيبوهم لمدارس وكيلوحو ليهم مضربات وزرابي وكينعسو. صور حصلات عليها “كود” ديال هاد الفرق كتحشم. هاد مول المهرجان رئيس جمعية الاطلس الكبير لكنيدري ما بغاش يحشم. لا الزمان زمانو ولا الوقت ديال هاد التكرفيصة لفنانين فحياتهم مكرفصين. حقاش كل واحد كيخدم فمنطقتو والفن دايرو حب واستمتاع ماشي مهنة. غالبية الفرق هاكدا هاديك الكذبة ديال “ملتقى الرمزيات والايحاءات، من أجل تثمين والحفاظ على الموروث الثقافي الوطني” اللي دايرنها شعار فالمهرجان راها حشومة. تهلاو فالناس ديوها لفنادق ماشي 5 نجوم غير فنادق تحترم ادميتهم
