"حنا كولّنا أمّي فتيحة"

أستاذ جامعي، كاتب ومترجم
—
باش تجي شي مراة أو تحرق راسها، ضروري نقولوا باللي هادي "شهيدة"، "شهيدة لقمة العيش والكرامة"، ماشي مختلة كيف بغاوْا بعض المسؤولين غير المسؤولين إوهموا الرأي العام، أو اللي دفع فتيحة تقتل راسها هي فى الأساس "الحگرة" اللي حسّات بيها لمّا جاوْا المخازنية أو أدّاوْا ليها سلعتها أو فلوسها كيف ما جا على يد شاهدة عيان في فيديو، أو الطامة الكبيرة هي لمّا قال ليها مسؤول "دابا ندوز فوق منك بالطموبيلة"، يعني ما هي غير نملة، حشرة، دودة، ماشي كائن، كون كان شي مول الهيبة أو الصّولاجان، ما كاين غير "آمر نعاماس"، "شنو حبّ الخاطر؟" بحال بهلان المتملق الكبير بن كيران: "قولت ألْسيدنا، والله أو أدّخلني ألّحبس، أنا ديما معاك".

واش جا هاد أستاذ السلك اللول، مول التكوين الهشيش أو الهضرة "بوكو"، باش يخدم أو إحل مشاكل المغاربة أو المغربيات ولا ّ باش يلسح صبّاط الملك؟ ولاكن الله إنجّيك من المشتاق إيلا فاق، من عوينة السلطة إيلا داق، باع أمّو، الله الرزّاق، أو حكومة هاد خييّنا اللي يدّيها كولّها دم هاد المراة الفقيرة اللي ما كاتمتاهن لا الدعارة، لا الشفرة ولا ّ الفساد السياسي المؤسساتي، هي المسؤولة اللولة، ولاكن إيلا ماتت بنت الشعب؟ فينا هو المشكل؟ هاكدا كاتخمّم هاد الطبقة السياسية الإنتهازية اللي كاتفكّر غير كيفاش أطّرطق حساباتها البنكية بالدرهم، أو اللي شاط كاتهرّبو ألّخارج.

هاد الحكومة ما حرقاتش غير "أمّي فتيحة"، ولاكن "حرقاتنا حتى حنا معاها"، شنو قدّمات لينا لحدّ الآن هاد الحكومة؟ والو! غير اللي هضر ولا ّ شوّش على نعاسها كاتصيفط ليه الهرمكة أدّاعبو، أو لمّا قال "بن جيعان"، "عييّطو على الدولة"، ما كان كاينوي فى خاطرو غير صيفطوا ليهم عصاة "سيدنا سوليمان"، ثلاثة ميترو ديال الطّول، كوّلها مسامر أو قيح، أو اللي ما شلّلاتوش، هرّسات ليه علّ الأقل الكتف ولا ّ السّاق.

هاد ممثلين السلطة أو الشطط ما عندهم حتى شي غيرة على الشعب، هاجس البعض منهم، كاينين الشرفاء، "الحق يقال"، هو تعنيف، ترهيب المستضعفين، لأنهم عندهم مشكل مع نفوسهم "ديجا" أو عندهم مركب نقص مزمن، أو ما كايحسّوا بالراحة أو الإطمئنان غير إيلا هانوا ناس خيرين ضعف منهم، زايدون عايشين براسهم محگورين من طرف اللي فوق منهم، أو داك الشعور السلبي كايبغيوْا إتّخلّصوا منو لمّا كايفرّغوه فى واحد آخور فى وضع هش منهم، كما كاين كذلك عدم الإحساس، لأن جميع الحواس ماتت أو ما بقات الذات غير "ديكور" كاتأتّت الجلد اللي ضاير بيها، زيد عليها فقدان حس التعاطف أو الذكاء العاطفي، على داك الشي كايكوبّ هادا أوْ لاخور جميع المشاعر السلبية فى اللي حداه، أنا تعيس، مكروه، معدّب مع الزمان أو البشر، خلّيني أنطرطق بعدا هاد الكبت فى "أمّي فتيحة" أو "أخّوتها".

ضروري نحللّوا علاش أتّاخدات "أمّي فتيحة" هاد النوع بالضبط من الإنتحار اللي يمكن لينا نعتابروه أخطر نتحار على وجه الأرض، عن طريق هاد الإنتحار كاتبغي تقول لينا المرحومة، الله إوسّع عليها أو على كول ّ واحد ستشهد من أجل طرف ديال الخبز النظيف، "حشومة" عليهم يدّيوْا ليّا سلعتي أو فلوسي، حشومة ما إخلّيونيش نوكّل، نعوّل بنتي، حشومة يستغلّوا وضعي الإجتماعي، حشومة عليهم إحرموني من الحياة، حشومة إسدّوا عليّا جميع البيبان، أمي فتيحة كاتجسد التقاطب اللي كانعيشوه اليوما: بين الكرامة، الشرف أو العار، الفضيحة، بين الجاه أو الإحتقار، الإحترام، الهيبة أو الإستهتار أو السخرية.

أو هاد الشي اللي عاشتو أمي فتيحة عُملة عادية فى مغربنا السعيد، حنا ما كانقدّروا غير اللي كايمكن ليه إعفص علينا، أمّا اللي ضعف منا كاندوزوا فوق منو بالطموبيلة ولا ّ بالدكّاكة، هادي أخلاق متخلقة أو ديال مجتمع متخلف، كولّو خبث، شماتة، كبت، لأنه ما كاتبقاش فى المنصب ولا ّ فى المظاهر، ولا ّ شحال عندك فى الكونط، ولاكن كيفاش كاتّعامل مع كولّ واحد، عندو ولا ّ ما عندوش، كبير ولا ّ صغير، مختل ولا ّ بعقلو، سكران ولا ّ ساحي.

أمّي فتيحة حرقات راسها أو معاها الحگرة اللي حسّات بيها، الحريگ ألأروبة، الموت فى البحر، البطالة المزمنة، العنف الجسدي أو اللفظي اللي كانعيشوه، المستقبل المسدود، سباب هاد الصّداع كولّو ديال الراس هي السياسات التعليمية ديال جميع هاد الحكومات اللي تعاقبات، أو كولّهم مرتابطين بلغة التعليم، سياسة تعريب التعليم هي المشكلة اللولة فى هاد البلاد، لأن هاد المشروع ما عندو حتى شي رتباط، لا بالأرض لا باللي كايعيش فوقها.

جميع الشعوب المتقدمة كيف كاتهضر كاتكتب، حتى الصين اللي عايشين فيها كثر من مليار أو تلت ميات مليون نسمة، كيف كايهضروا كايكتبوا، الفلاح التّالي كايعرف يستعمل التّراكتور ولا ّ "الآيفون"، حنا كانقهروا أولاد الشعب بالعربية أو كانلوحوهم من بعد للشارع، فى الدار البيضا، الرباط، سلا، بني ملال، وجدة، أكادير، طنجة، الحاجب، إفران، عين شكاك، صفرو، فاس، مكانس، الكويرة، الداخلة، الحسيمة، الناضور، مراكش، أوريكة، الصويرة ولا ّ فى سطوكهلم، أو هادوا اللي كايدافعوا على التعريب باغيينّا أنّتاحروا بحال "أمّي فتيحة"، اللغة العربية أو التدريس بيها ما كاينتج غير الفقر، "إزهاق الأرواح" أو كايخدم مشروع التيارات الإسلامية اللي كاترفض فى العمق حقوق الإنسان، حقوق المرأة، بكل ختصار الدولة الحديثة أو باغية لينا الكلاخ "حتى يرث الله الأرض".