نهار بدا ويكيليس ينشر كاع لفضايح ديال ميريكان ومعاها فضايح دول كثيرة وعرى بزاف منها المغرب٬ كان تنشرات وثيقة كتقول باللي رجل اعمال فلسطيني بهاد الدين شنبلي وقعات ليه مشاكل فمشروع فعين الدياب فكازا حدا جامع السعود. دارت مراسلة من السفارة الامريكيةفقطر يوم 11 دجنبر 2009 كتقول باللي وقع اجتماع يوم تاسع دجنبر باللي شنبلي وقال فيه باللي اللي بغى يستثمر فالمغرب خاصو يدور. لكن ماشي هادي هي المهمة حقاش تكتبات ديك الوقت وتنشرات وكلشي فراسو لخبار. المهم هو شكون هاداك المرسول اللي قدماتو مراسلة امريكية من سفارتها في قطر الى الخارجية واللي قال باللي فالمغرب ما كاين غير “الهمة والماجيدي” والملك؟ فهاد المراسلة الجديدة اللي تم الكشف عنها٬ كنعرفو مول هاد الهدرة بعد ما كانت غير شكوك فيه وفغيرو. يتعلق الامر بماجد التذلاوي. المراسلة كتقول باللي التذلاوي جا لقطر 23 نونبر 2009 ومعاه هاد رجل الاعمال الفلسطيني. شكون هاد التذلاوي؟ نهار تم تعيين حسن الورياغلي خلفا لحسن بوهمو على رأس الشركة الوطنية للاستثمار =الهولدينك الملكي= اللي غير اسمو دابا ولى “المدى”٬ خرج هاد المقرب جدا جدا من منير الماجيدي مدير الكتابة الخاصة للملك ودار اللقاءات مع صحافيين خاصة اجانب كيشرح هاد الشي. لدرجة ان هاد السيد تكلم ف”جون افريك” وقال باللي “جابو” الورياغلي”٬ اي انو ماشي غير كيحكم٬ بل يدخل ويخرج. هاد الشخص من الزماكرية. دخلاتو صديقتو سميرة سيطايل لهاد الدوائر حتى ولى كيحكم ويستقبلوه رجالات الدولة ويحكم ويعطي الاوامر. اييه. متحكم فامور كثيرة. دابا البوسط اللي عندو هو رئيس المدير العام ل”اونا بار” =شركة العقار ديال الهولدينك الملكي “المدى= الاسم الجديد للشركة الوطنية للاستثمار= كما يشغل بهاد الصفة منصب عضو فالمجلس الاداري ل”المدى”. فهاد المراسلات الجداد فيها تفاصيل كثيرة على دور التذلاوي على الطريقة اللي كيتم فيها الاستثمار. اييه هادي عندها 8 سنين ولكن هاد السيد اللي كان ماشي قوي بزاف ديك الساعة داير هاد الحالة راه تقوى عشرات المرات اليوم.
