عيب ” السل” يصيب أطباء في مراكش لي كانبيعوها للعالم على اساس انها وجهة سياحية عالمية كايجيو ليها النجوم و المشاهير و رؤساء الدول من كل حذب و صوب باش يدوزو ليفاكونص و يحتافلو بعيد ميلاداتهم و عراساتهم !

وضعية قطاع الصحة وضعية كارثية و هادي حاجة معروفة ! قطاع مخوراه السوسة ديال الرشوة و انعدام الامكانيات المادية و الاطر الكافية ! و حتى الاطر لي متوفرة حاليا جزء كبير منها واخد مهنة الطب كوسيلة للاغتناء السريع ! كاتلقا طبيب كساب و طبيب مقاول و طبيب كايبيع و يشري فالأثات …و جزء قليل لي كاتلقاه كايمارس الطب عن اقتناع و محتارم قسم أبوقراط و كايسهر على راحة المرضى ! ما تبقا غا الگزار على خوه ! نتا كاتشكي عليه و هوا كايشوف شحال يقدر ينتف منك ديال الفلوس باش يسالي الجليج ديال الكوزينا د الفيلا الجديدة !
تقدر تكون مامحتاجش عملية و يفتحو ليك فالكنينيك باش ينتفو منك ميمي !
و تقدر تكون محتاج عملية فالسبيطار و مستعجلة و يصدروك بشي رونديفو مورا ست شهور تايكون مول الأمانة دا أمانتو.
بلا مانهضرو على التعامل لي كايتعاملو مع المرضى فحال الكلاب و الدفيع فالباب و التجرجير و السبان و الابتزاز لي كايتعرض ليه المريض داخل بزاف ديال المستشفيات المغربية.
و لكن باش توصل الحالة انه فمستشفى كبير فحال مستشفى الرازي بمراكش اكثر من ربعة د الاطباء يمرضو بداء السل و العدد في ارتفاع هادي راه كارثة حقيقية !
آشمن سعد المجرد واشمن اخبار ! الاطباء لي سونسي يعالجو المرضى هوما براسهم طاحو مراض بسباب انعدام التهوية و الوسائل لي يمكن تحميهم من فحال هاد الأمراض.
و هادشي كامل كايدوز فحالا عادي ! عادي اطباء يمرضو ! و ملي يمرضو شكون لي غايداوي المرضى ؟
راه عيب هادشي يوقع فدولة باغا تفتاتح خط التيجيفي فالشهورا الجايين و تموقع راسها كقاطرة في افريقيا و قوة اقليمية لها وزن اقتصادي و سياسي و ديبلوماسي … عيب ” السل” يقتل أطباء في مراكش لي كانبيعوها للعالم على اساس انها وجهة سياحية عالمية كايجيو ليها النجوم و المشاهير و رؤساء الدول من كل حذب و صوب باش يدوزو ليفاكونص و يحتافلو بعيد ميلاداتهم و عراساتهم !
نفس مراكش لي عاد كانت فيها مادونا مقصرة و كاتبارطاجي فالتصاور ديالها باللبسة الأمازيغية ! نفس مراكش ديال لوطيلات و الكازينو و لابيسينات هي نفسها فيها اطباء اليوم حياتهم في خطر بسباب مرض الناس لقاو ليه العلاج هادي قرون و قرون !
فالصراحة هاد قطاع الصحة فالمغرب خاصو شي تسييقة فاعلة تاركة من ساسو لراسو ! بعيدا عن الهضرة لي ماتشري خضرة ديال سوف و المخططات و الستراتيجيات و ديك الهضرة الغليضة ! الوردي كان بدا خدمة زوينة فهاد القطاع و لكن للأسف مشا فحالو …
كانتمنى الدولة تتسوق شوية لهاد القطاع بمزيد من الجدية حيت وصلنا للنيفو ديال خرانا مايجمعوه شراوط