اغلب الفنانة ديال هاد الجيل قافزين على لي سبقوهم ! باغين يوصلو و يديرو الفلوس و يضمنو مستقبلهم و كايحاولو يضبرو على راسهم فالسيتكومات و الاشهارات و كل ما هي گاميلة كايغرفو منها ! و هادي حاجة مزيانة‎

كأي رمضان كانطل على التلفزة المغربية باش نشوف واش كاين شي جديد ! و طبعا كأي رمضان طليت و قلبت الدورة !
و لكن حيت كانفرض على راسي نكون حقانية قد ماقدرت ! و نشوف الزوينة و الخايبة ! غانقول بلي الحاجة لي بانت ليا و لي تقدر تكون زوينة هي نهاية الاحتكار ديال التلفزة من طرف بعض الوجوه لي ولفت نشوفهم ! ايه مازال كاينين شي دايناصورات تما كايعصرو البزيزيلة و لكن ولاو معاهم كوميديين شباب !فارضين راسهم فالساحة كوميديين من هاد الجيل ! و هادي حاجة تحسب للتلفزة.
هاد الوقت وليتي تقدر تبدا بفيديو فيوتوب و لاعجبتي الناس بلاصتك راها مضمونة فالتلفزة ( مثلا مونية ماگيري الشهيرة بشخصية شكيب عصفور)
حاجة اخرى لي لاحظتها هوا اغلب الفنانة ديال هاد الجيل قافزين على لي سبقوهم ! باغين يوصلو و يديرو الفلوس و يضمنو مستقبلهم و كايحاولو يضبرو على راسهم فالسيتكومات و الاشهارات و كل ما هي گاميلة كايغرفو منها ! و هادي حاجة مزيانة ! حيت على الاقل كانظن بلي هاد الجيل ديال الفنانة ماغاديش نشوفوه من هنا واحد ثلاتين عام كايبكي و يشكي فالتلفزة حيت ساكن فبيت فالسطح و لا كاري بيت مع الجيران و لا مريض و ماعندوش باش يشري الدوا ! و كايطالب صاحب الجلالة يعتقو …
جيل جديد ديال الفنانة الشباب لي غالبا شافو شنو طرا لي دازو قبل منهم و ماباغينش يعاودوه !
هادشي كلو مزيان ! و كانشجع اي فنان و لا رياضي فهاد البلاد انه يجمع الگرمومة و يضمن مستقبلو و مستقبل وليداتو ! و طبعا راه ماكاين تا تعارض بين الفن و الگرمومة و بين الابداع و الفلوس و ديك الهضرة ديال ” الفن من رحم المعاناه ” راه غير كايكردو بيها على برهم … بالعكس للفلوس كايساعدو على الابداع و الفن و لكم في الممثليين الهوليوديين خير مثال…
غير هوا ! واخا الوجوه تبدلات و الفنانة الشباب دخلو للتلفزة و دارو بلاصتهم مازال النيفو ديال الابداع طايح ! ماتزعزعش قيد أنملة ( زوينة هاد قيد أنملة ياك) !
مازال ديك الثنائية ديال العروبي و المديني و الحازق و لي لاباس عليه هي لي مسيطرة على الكوميديا و الدراما المغربية ( التعربين زايد نغزة).
صفر ابداع حتى من الدراري و البنات لي كنت انا كانشوف فيهم يقدرو يحركو هاد العجينة البايتة د الكوميديا فالمغرب ( مونية ماگيري مثلا) ! ! علاش ؟
ماعرفتش الصراحة ! واحد الراس كايقوليا راه هادشي سبابو الطابوهات لي كاتفرضهم التلفزة على الفنان و لي كاتقيدو بمجموعة من السناسل كاتمنعو من الابداع !
واحد الراس اخر كايقوليا هادشي سبابو الطابوهات كاملين لي كانعيشو وسطهم ! حيت كيما كلشي عارف راه مستحيل تصنع كوميديا بلا ماتضحك على ثلاتية الدين و الجنس و السياسة.
و واحد الراس آخر كايقوليا ! وا الهبيلة راه واخا تحيدي هادشي كلو ! و تحل ليهم باب الابداع على مصرعيهم راه هادشي لي عطا الله!
انا شخشيا كانآمن بلي خاص شي ثورة فهاد القطاع السمعي البصلي و لكن هاد الثورة ماغاديش تجي لاكان جزء كبير من الشعب راضي على مستوى الاعمال و كايحل فمو فيها و كايتكرشخ بالضحك فاش كايسمع دوك ليفان الحامضين دياولها ….
و لحد الساعة ! الارقام ديال المشاهدات كاتبين على رضى الشعب على منتوجات الاعلام العمومي.
ايوا انا مانزيدكم من عندي غير الله يجعل كلشي مبارك و مسعود